തിരുവനന്തപുരം: മുന് എംപി പി.കെ. ബിജുവിന്റെ ഭാര്യ ഡോ. വിജി വിജയന് സ്വന്തം ഗവേഷക പ്രബന്ധങ്ങളില് മറ്റു പ്രബന്ധങ്ങളില്നിന്ന് ഡേറ്റ പകര്ത്തിയെന്ന ആരോപണം ഉയര്ന്നതിനു പിന്നാലെ വിജിയുടെ ഗവേഷക ഗൈഡ് അടക്കമുള്ള മുതിര്ന്ന അധ്യാപകരും ഡാറ്റ തിരിമറികള് നടത്തിയതായി കണ്ടെത്തല്. ഗവര്ണര്ക്കും യുജിസി ചെയര്മാനും സേവ് യൂണിവേഴ്സിറ്റി കാമ്പയിന് പരാതി നല്കി.
വിജി വിജയന്റെ ഗവേഷക ഗൈഡും സര്വകലാശാല സെനറ്റംഗവുമായ പ്രൊഫ. ഹെലന് ആന്റണി, വിജിയെ സര്വകലാശാലയില് നിയമിക്കുന്നതിനുള്ള സെലക്ഷന് കമ്മിറ്റി അംഗവും ബയോ കെമിസ്ട്രി വകുപ്പു മേധാവിയുമായ പ്രൊഫ. എസ്. മിനി, വിജി വിജയനോടൊപ്പം കേരള സര്വകലാശാലയില് നിയമിതനായ അസിസ്റ്റന്റ് പ്രൊഫസര് പി.എ. ജനീഷ് എന്നിവരുടെ ഗവേഷണ പ്രസിദ്ധീകരണങ്ങളില് ഇത്തരം ഡാറ്റാ തട്ടിപ്പുകളുണ്ടെന്നാണ് സേവ് യൂണിവേഴ്സിറ്റി കാമ്പയിന് പരാതി നല്കിയത്. ഡാറ്റാ തട്ടിപ്പിന്റെയെല്ലാം വിശദാംശങ്ങളും തെളിവുകളുമടക്കമാണ് പരാതി ഗവര്ണര്ക്ക് കൈമാറിയത്.
ബയോകെമിസ്ട്രി പോലുള്ള സങ്കീര്ണ വിഷയങ്ങളിലെ ഗവേഷണ പ്രബന്ധങ്ങളില് നിന്നും ഗവേഷണ പ്രസിദ്ധീകരണങ്ങളില് നിന്നും ഡാറ്റാ ഇമേജ് അടക്കം പകര്ത്തിയെടുത്ത് സ്വന്തം പ്രബന്ധങ്ങളിലും പ്രസിദ്ധീകരണങ്ങളിലും ചേര്ത്ത് പ്രസിദ്ധീകരിക്കുന്നത് കണ്ടുപിടിക്കാനായി രൂപം നല്കിയിട്ടുള്ള പബ് പിയര് എന്ന വെബ് പോര്ട്ടല് വഴിയാണ് ഈ ഡേറ്റ തട്ടിപ്പുകള് പുറത്തു കൊണ്ടുവന്നത്.
പകര്പ്പിനെക്കുറിച്ച് ആരോപണങ്ങളുയര്ന്നപ്പോള് പ്രബന്ധങ്ങളിലെ തെറ്റുകള് മനസിലാക്കാനുള്ള മാര്ഗമായാണ് പബ് പിയറിനെ താന് കണ്ടിട്ടുള്ളതെന്ന വാദവുമായി വിജി വിജയന് മുന്നോട്ടു വന്നിരുന്നു. തന്റേതില് മാത്രമല്ല മറ്റു പലരുടെയും പ്രബന്ധങ്ങളില് ഇങ്ങനെ സംഭവിച്ചിട്ടുണ്ടെന്നുകൂടി ഫേസ്ബുക്കില് പോസ്റ്റിട്ടപ്പോഴാണ് സേവ് യൂണിവേഴ്സിറ്റി കാമ്പയിന്, മറ്റ് അധ്യാപകരുടെ പ്രബന്ധങ്ങള് കൂടി പബ് പിയര് വഴി പരിശോധനയ്ക്ക് വിധേയമാക്കിയത്. ഡാറ്റാ തട്ടിപ്പ് നടത്തി സമര്പ്പിച്ച ഗവേഷണ പ്രസിദ്ധീകരണങ്ങളുടെ അടിസ്ഥാനത്തില് കൂടിയാണ് വിജി വിജയന് സര്വകലാശാലയില് അസിസ്റ്റന്റ് പ്രൊഫസ്സറായി നിയമനം ലഭിച്ചത്.
ദേശീയ ഗവേഷണ സ്ഥാപനങ്ങളിലെ വിദഗ്ധരെ കൊണ്ട് ഡാറ്റാ തട്ടിപ്പ് പരിശോധിപ്പിക്കണമെന്നും പരാതികള് വസ്തുതാപരമാണെന്ന് ബോധ്യപ്പെട്ടാല് ഇവരെ സര്വകലാശാലയില് നിന്ന് നീക്കം ചെയ്യണമെന്നും സേവ് യൂണിവേഴ്സിറ്റി കാമ്പയിന് പരാതിയില് ആവശ്യപ്പെട്ടിട്ടുണ്ട്.
