ബത്തേരി: ജില്ലയില്‍ നിന്നും ബംഗളൂരൂവിലേക്കുളള കെഎസ്ആര്‍ടിസി ബസ് സര്‍വ്വീസ് നിര്‍ത്തി. ബത്തേരി ഡിപ്പോയില്‍ നിന്നും കുട്ടവഴി ബംഗളൂരൂവിലേക്ക് പോകുന്ന കെഎസ്ആര്‍ടിസി ബസ് സര്‍വ്വീസാണ് ചൊവ്വാഴ്ച മുതല്‍ നിര്‍ത്തിയത്.
കഴിഞ്ഞദിവസം ബസ് ജീവനക്കാര്‍രോട് അധികൃതര്‍ ആര്‍ടിപിസിആര്‍ കൊറോണ നെഗറ്റീവ് സര്‍ട്ടിഫിക്കറ്റ് ആവശ്യപ്പെട്ടിരുന്നു. തുടര്‍ന്ന് കര്‍ണ്ണാടക അധികൃതര്‍ ബംഗളൂരുവിലേക്ക് സര്‍വ്വീസ് നടത്തിയ ബസ് കുട്ട അതിര്‍ത്തിയില്‍ ഒന്നര മണിക്കൂറോളം തടഞ്ഞിട്ടു. ഇതോടെയാണ് സര്‍വ്വീസ് നിര്‍ത്താന്‍ കെഎസ്ആര്‍ടിസി അധികൃതര്‍ തീരുമാനിച്ചത്. ജില്ലയില്‍ നിന്നും കുട്ടവഴി ബംഗളൂരൂവിലേക്കുള്ള ഏക സര്‍വ്വീസാണ് ഇതോടെ നിലച്ചിരിക്കുന്നത്.
നിലവിലെ സാഹചര്യത്തില്‍ ബത്തേരി ഡിപ്പോയില്‍ നിന്നും ലഭ്യമാകുന്ന ഡ്രൈവര്‍മാരെ വെച്ചാണ് സര്‍വ്വീസ് നടത്തിയിരുന്നത്. ഇവരോട് ആര്‍ടിപിസിആര്‍ ടെസ്റ്റ് എടുത്ത് കയ്യില്‍ കരുതണമെന്ന് പറയാന്‍ പറ്റാത്ത അവസ്ഥയാണ്. നിലവില്‍ കോഴിക്കോടുനിന്നുമുളള സര്‍വ്വീസുകള്‍ അധികവും കുട്ടവഴിയാണ് കര്‍ണാടകയിലേക്ക് സര്‍വ്വീസ് നടത്തുന്നത്.
ജീവനക്കാര്‍ക്ക് ആര്‍ടിപിസിആര്‍ നെഗറ്റീവ് സര്‍ട്ടിഫി്ക്കറ്റ് വേണമെന്നുള്ളത് കെഎസ് ആര്‍ടിസിയെ സംബന്ധിച്ച് അപ്രായോഗികമായതിനാല്‍ വരും ദിവസങ്ങളില്‍ ഈ സര്‍വ്വീസുകളും നിറുത്തേണ്ടി വരുമോയെന്ന ആശങ്കയിലാണ് അധികൃതര്‍. നിലവില്‍ മുത്തങ്ങ വഴി പോകുന്ന ബസ്സുകള്‍ക്ക് ഈ നിയന്ത്രണങ്ങള്‍ ഇല്ല. വരുംദിവസങ്ങളില്‍ ഇവിടെയും നിയന്ത്രണങ്ങള്‍ വന്നേക്കാം എന്നാണ് ലഭിക്കുന്ന സൂചന. നിലവില്‍ ജില്ലയില്‍ നിന്നും അതിര്‍ത്തി സംസ്ഥാനമായ തമിഴ്‌നാട്ടിലേക്കുള്ള സര്‍വ്വീസുകള്‍ ഒന്നും തന്നെ കെഎസ്ആര്‍ടിസി നടത്തുന്നില്ല.
പ്രതികരിക്കാൻ ഇവിടെ എഴുതുക: