കൊല്ലം : ചവറയില് വധശ്രമക്കേസില് റിമാന്ഡിലായ പ്രതിയുടെ വീടിന് തീപിടിച്ചു. തട്ടാശ്ശേരിക്ക് പടിഞ്ഞാറ് ചെറുശേരിഭാഗം സുനിലിന്റെ വീടിന്റെ മുകളിലത്തെ നിലയാണ് കത്തി നശിച്ചത്. ഞായറാഴ്ച പുലര്ച്ചെ വീടിനുള്ളില്നിന്നും തീ ഉയരുന്നതുകണ്ട് സമീപവാസി അഗ്നിരക്ഷാ സേനയെ വിവിരമറിയിക്കുകയായിരുന്നു.
ഫര്ണീച്ചറുകളും മറ്റും കത്തി നശിച്ചു. തീ അണച്ചശേഷം നടത്തിയ തെരച്ചിലില് താഴെത്തെ നിലയിലെ മുന് വാതില് തുറന്ന നിലയിലായിരുന്നു. കിടപ്പു മുറിയിലെ അലമാര കുത്തിതുറന്ന് വസ്ത്രങ്ങളും മറ്റും വാരി വലിച്ചിട്ട നിലയില് കണ്ടെത്തി. സംഭവത്തില് പരാതി നല്കാനെത്തിയ സുനിലിന്റെ അമ്മ പോലീസ് സ്റ്റേഷനില് കുഴഞ്ഞു വീണു. തുടര്ന്ന് ഇവരെ ആശുപത്രിയില് പ്രവേശിപ്പിച്ചു.
മദ്യം വാങ്ങുന്നതുമായി ബന്ധപ്പെട്ട തര്ക്കത്തെ തുടര്ന്ന് സുനിലിന്റെ വീടിനു മുന്നിലെ റോഡില്വച്ച് ദിവസങ്ങള്ക്ക് മുമ്പ് സംഘര്ഷം ഉണ്ടാവുകയും കാവുവിള കിഴക്കേത്തറ വീട്ടില് പ്രമോദിനു വെട്ടേല്ക്കുകയും ചെയ്തിരുന്നു. സംഭവത്തില് വധശ്രമത്തിനു കേസെടുത്ത പൊലീസ് സുനില് ഉള്പ്പെടെ മൂന്നു പേരെ അറസ്റ്റ് ചെയ്തു. ഇവര് റിമാന്ഡിലാണ്. അന്നു മുതല് സുനിലിന്റെ വീട്ടില് ആരും താമസം ഉണ്ടായിരുന്നില്ല. തീപിടിച്ചത് സംബന്ധിച്ചു കേസ് എടുത്ത് അന്വേഷണം ആരംഭിച്ചതായി ചവറ പോലീസ് അറിയിച്ചു.
