കല്പ്പറ്റ : കോവിഡ് വ്യാപനത്തെ തുടര്ന്ന് വയനാട്ടില് 10 തദ്ദേശ സ്ഥാപനങ്ങളില് ജില്ലാ കളക്ടര് നിരോധനാജ്ഞ പ്രഖ്യാപിച്ചു. കല്പ്പറ്റ, ബത്തേരി നഗരസഭകളിലും കണിയാമ്പറ്റ, തിരുനെല്ലി, നെന്മേനി, അമ്പലവയല്, തരിയോട്, പൊഴുതന, വെങ്ങപ്പള്ളി, മേപ്പാടി പഞ്ചായത്തുകളിലുമാണു കോവിഡ് പ്രതിരോധത്തിന്റെ ഭാഗമായി കളക്ടര് 144 പ്രഖ്യാപിച്ചത്. ഇതില് രണ്ടെണ്ണം നഗരസഭാ പരിധിയിലാണ്.
കോവിഡ് വ്യാപനം സംസ്ഥാനത്ത് രൂക്ഷമായ സാഹചര്യത്തിലാണ് ഈ നടപടി. കോഴിക്കോട് ജില്ലയില് നിലവില് 32 തദ്ദേശസ്ഥാപനങ്ങളിലായി 108 വാര്ഡുകളാണ് കണ്ടെയ്ന്മെന്റ് സോണുകളായി പ്രഖ്യാപിച്ചിരിക്കുന്നത്.
രോഗവ്യാപനത്തിന്റെ പശ്ചാത്തലത്തില് നിയന്ത്രണങ്ങള് ഏര്പ്പെടുത്തിയെങ്കിലും പാലിക്കപ്പെടാത്ത സാഹചര്യത്തെ തുടര്ന്നാണ് എല്ലാകണ്ടെയ്ന്മെന്റ് സോണിലും ജില്ലാ കളക്ടര് 144 പ്രഖ്യാപിച്ചു. ഇവിടങ്ങളില് പൊതുജനങ്ങള് ഒത്തുകൂടുന്നത് ഒഴിവാക്കാനും അഞ്ച് പേരില് കൂടുതല് ആളുകള് ഒരുമിച്ചിരിക്കരുതെന്നും നിര്ദ്ദേശം നല്കിയിട്ടുണ്ട്. എന്നാല് അവശ്യ സേവനങ്ങള്ക്കും തൊഴിലിനും ഇളവ് നല്കിയിട്ടുണ്ട്. നിയന്ത്രണങ്ങള് ലംഘിക്കുന്നവര്ക്കെതിരേ കര്ശ്ശന ശിക്ഷാനടപടികള് സ്വീകരിക്കാന് പോലീസിന് ജില്ലാ കളക്ടര് നിര്ദ്ദേശം നല്കിയിട്ടുണ്ട്.
അതിനിടെ കോവിഡ് പ്രതിരോധത്തിനെ തുടര്ന്ന് തിരുവനന്തപുരം വഴി കേരളത്തില് നിന്ന് തമിഴ്നാട്ടിലേക്കുള്ള ഇടറോഡുകള് തമിഴ്നാട് പോലീസ് അടച്ചു. അതിര്ത്തിയിലെ പ്രധാന റോഡുകളില് കര്ശന പോലീസ് പരിശോധനയും തമിഴ്നാട് സര്ക്കാര് ഏര്പ്പെടുത്തി.
നിലമാമൂട്, ഉണ്ടന്കോട്, പളുകല് തുടങ്ങിയ മേഖലകളിലാണ് കൂടുതല് നിയന്ത്രണങ്ങള്. ഇവിടങ്ങളിലെ ഇടറോഡുകളുടെ തമിഴ്നാട് ഭാഗത്താണ് ഗതാഗതം പൂര്ണമായും നിരോധിച്ചത്. കേരളത്തില് നിന്നുള്ളവര് തമിഴ്നാട്ടിലേക്ക് പ്രവേശിക്കുന്നത് തടയാനാണ് പോലീസിന്റെ കര്ശന നടപടി. അതിര്ത്തിയിലെ പരിശോധനയും കര്ശ്ശനമാക്കിയിട്ടുണ്ട്. പരിശോധന നടത്തിയ ശേഷമാണ് കേരളത്തില് നിന്നുള്ള വാഹനങ്ങള് തമിഴ്നാട്ടിലേക്ക് കടത്തിവിടുന്നത്.
