കൊല്ക്കത്ത : ബംഗാളിലെ കോണ്ഗ്രസ് സ്ഥാനാര്ത്ഥി കോവിഡ് ബാധിച്ച് മരിച്ചു. മുര്ഷിദാബാദ് ജില്ലയിലെ സംസര് ഗഞ്ച് മണ്ഡലത്തിലെ സ്ഥാനാര്ത്ഥിയായ റിസാഹുല്ഹഖാണ് കോവിഡ് ബാധിച്ച് മരിച്ചത്. വൈറസ് രോഗബാധ കണ്ടെത്തിയതിനെ തുടര്ന്ന് സ്വകാര്യ ആശുപത്രിയില് ചികിത്സയില് കഴിയുകയായിരുന്നു.
ബുധനാഴ്ച അര്ധരാത്രിയോടെയാണ് മരണം സ്ഥിരീകരിച്ചത്. ബംഗാള് പ്രദേശ് കോണ്ഗ്രസ് സെക്രട്ടറി രോഹന് മിത്ര ട്വിറ്ററിലൂടെയാണ് മരണ വിവരം അറിയിച്ചത്. സംസ്ഥാനത്ത് നാലാം ഘട്ട തെരഞ്ഞെടുപ്പ് നടക്കാനിരിക്കെയാണ് കോവിഡ് ബാധിതനായി റിസാഹുല് ഹഖിന്റെ മരണം.
സംസ്ഥാനത്തെ കോവിഡ് കേസുകള് വീണ്ടും ഉയരുന്നതും രണ്ടാം തരംഗം വ്യാപന ഭീഷണിയും കണക്കിലെടുത്ത് ബംഗാളില് എല്ലാപാര്ട്ടികളുടേയും യോഗം തെരഞ്ഞെടുപ്പ് കമ്മിഷന് വിളിച്ചു ചേര്ത്തിട്ടുണ്ട്. തെരഞ്ഞെടുപ്പ് പ്രചാരണങ്ങളിലേയും മറ്റും കോവിഡ് നിയന്ത്രണങ്ങള് ചര്ച്ച ചെയ്യുന്നതിനായാണ് കമ്മിഷന് വിളിച്ചിരിക്കുന്നത്.
