തിരുവനന്തപുരം : സംസ്ഥാനത്തെ കോവിഡ് രണ്ടാംതരംഗം ജനിതക മാറ്റം വന്ന വൈറസ് ആണോയെന്ന് അറിയുന്നതിനായി പരിശോധന ആരംഭിച്ചു. പ്രതിരോധശേഷിയെ മറികടക്കാന് കഴിവുള്ള 13 തരം ജനിതകമാറ്റങ്ങള് നേരത്തെ കേരളത്തിലെ കൊറോണ വകഭേദങ്ങളില് കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് പരിശോധന നടത്തുന്നത്.
ഇതിന്റെ ഭാഗമായി സംസ്ഥാനത്തെ പതിനാല് ജില്ലകളില് നിന്നും ശേഖരിച്ച സാമ്പിളുകള് ദല്ഹിയിലെ ഇന്സ്റ്റിറ്റ്യൂട്ട് ഓഫ് ജിനോമിക്സ് ആന്റ് ഇന്റഗ്രേറ്റീവ് ബയോളജിയിലേക്ക് അയച്ചിട്ടുണ്ട്. അടുത്ത ആഴ്ചയോടെ ഫലം കിട്ടുമെന്നാണ് പ്രതീക്ഷ. കേരളത്തില് ജനുവരിയില് നടത്തിയ പരിശോധനയില് വയനാട്, കോട്ടയം, കോഴിക്കോട്, കാസര്കോഡ് ജില്ലകളില് 10 ശതമാനത്തിലേറെ പേരില് വകഭേദം വന്ന എന് 440കെ വൈറസ് സാന്നിധ്യം കണ്ടെത്തിയിരുന്നു.
പ്രതിരോധശേഷിയെ മറികടക്കാന് കഴിവുള്ളതരം വൈറസാണിത്. ഇതുകൂടാതെ കൊറോണ വൈറസ് വകഭേദങ്ങളായ കെ1, കെ2, കെ3 എന്നിവയുടെ സാന്നിധ്യവും ചില ജില്ലകളില് സ്ഥിരീകരിച്ചിരുന്നു. ഈ സാഹചര്യത്തിലാണ് രണ്ടാം തരംഗ സാന്നിധ്യം പ്രകടമായ കേരളം വീണ്ടും പരിശോധന നടത്തുന്നത്.
വകഭേദം വന്ന വൈറസാണ് ഇപ്പോഴത്തെ വേഗത്തിലുള്ള രോഗവ്യാപനത്തിന് കാരണമെന്ന് കണ്ടെത്തിയാല് അതിജാഗ്രത പുലര്ത്തേണ്ടിവരും. വാക്സിന്റെ പ്രതിരോധ ശേഷിയേയും മറികടക്കാന് ഇത്തരം വൈറസുകള്ക്ക് കഴിഞ്ഞേക്കും. മഹാരാഷ്ട്രയിലെ രണ്ടാം തരംഗത്തില് പരിശോധിക്കുന്ന നാല് രോഗികളില് ഒരാള്ക്ക് ജനിതക മാറ്റം വന്ന വൈറസ് ആണ് രോഗ കാരണമാകുന്നത്. രോഗ വ്യാപനം കൂടിയാല് രോഗം ഗുരുതരമാകുന്നവരുടെ എണ്ണവും മരണവും കൂടിയേക്കാം .
