തൃശൂര്‍: കോര്‍പ്പറേഷനും സൗത്ത് ഇന്ത്യന്‍ ബാങ്കും സംയുക്തമായി നിര്‍മ്മിച്ച വടക്കേച്ചിറ ബസ് ഹബ്ബില്‍ യാത്രക്കാര്‍ക്കുള്ള അനുബന്ധ സൗകര്യങ്ങള്‍ വിപുലീകരിക്കുമെന്ന് മേയര്‍ എം.കെ വര്‍ഗീസ് അറിയിച്ചു. സൗത്ത് ഇന്ത്യന്‍ ബാങ്ക് പ്രതിനിധികളുമായി നടത്തിയ ചര്‍ച്ചയിലാണ് തീരുമാനം. ബാങ്കിന്റെ സിഎസ്ആര്‍ ഫണ്ടില്‍ ഉള്‍പ്പെടുത്തി നിര്‍മ്മിച്ച ബസ് ഹബ്ബില്‍ യാത്രക്കാര്‍ക്കുള്ള സീറ്റിങ് കപ്പാസിറ്റി വിപുലീകരിക്കും. ടോയ്‌ലറ്റുകളില്‍ എയര്‍ഫ്രഷ്‌നര്‍ സ്ഥാപിക്കുന്നതിനും ലേഡീസ് ടോയ്‌ലെറ്റുകളില്‍ വെന്റിങ് മെഷീന്‍ സ്ഥാപിക്കുന്നതിനും തീരുമാനമായി. ഗ്രീന്‍ പ്രോട്ടോകോള്‍ പാലിക്കുന്നതിന് വൈദ്യുതി സോളാര്‍ എനര്‍ജി പ്രകാരം നടത്തുന്നതിനായി തുടര്‍നടപടികള്‍ പൂര്‍ത്തീകരിക്കും.
ബസ് ഹബ്ബില്‍ ലോകോത്തര നിലവാരത്തില്‍ ഗാര്‍ഡനിങ് വിപുലീകരിക്കുന്നതിനും യാത്രക്കാര്‍ക്ക് ആസ്വാദനത്തിനായി എഫ്എം റേഡിയോ ഉള്‍പ്പെടെ കേള്‍ക്കുന്നതിനുള്ള സ്പീക്കര്‍ സിസ്റ്റം ഉള്‍പ്പെടെയുള്ള നിര്‍മ്മാണ പ്രവര്‍ത്തനങ്ങള്‍ നടപ്പിലാക്കുന്നതിന് ബാങ്കിന് നിര്‍ദ്ദേശം നല്‍കുമെന്ന് മേയര്‍ അറിയിച്ചു. ബസ് ഹബ്ബിന്റെ തുടര്‍ന്നുള്ള നടത്തിപ്പിന് മേയര്‍ അധ്യക്ഷനായും എസ്‌ഐബി റൗണ്ട് ശാഖയിലുള്ള 2 ഉദ്യോഗസ്ഥരെ നോമിനിയായും കോര്‍പ്പറേഷന്‍ സെക്രട്ടറിയും ബാങ്കും കോര്‍പ്പറേഷനും സംയുക്തമായി തെരഞ്ഞെടുക്കുന്ന ഒരു പ്രതിനിധിയും അടങ്ങുന്ന ഗവേണിങ് ബോഡി പുന:ക്രമീകരിക്കുന്നതിനും യോഗം തീരുമാനിച്ചു. ഡെപ്യൂട്ടി മേയര്‍ രാജശ്രീ ഗോപന്‍, കൗണ്‍സിലര്‍ സി.പി പോളി, സെക്രട്ടറി വിനു സി.കുഞ്ഞപ്പന്‍, ബാങ്ക് പ്രതിനിധികള്‍ എന്നിവര്‍ യോഗത്തില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: