തിരുവനന്തപുരം: തിരുവനന്തപുരം മണ്ഡലത്തില്‍ എന്‍ഡിഎ സ്ഥാനാര്‍ഥിയായി മത്സരിച്ചശേഷം അഭിനയരംഗത്ത് വീണ്ടും സജീവമാകാനൊരുങ്ങി നടന്‍ കൃഷ്ണകുമാര്‍. രാഷ്‌ട്രീയം വ്യക്തമാക്കിയതിന് പിന്നാലെ സൈബര്‍ ആക്രമണത്തിന് ഇരയായെന്ന് അദ്ദേഹം സ്വകാര്യവാര്‍ത്താ ചാനലിനോട് പ്രതികരിച്ചു. സ്ഥാനാര്‍ഥിയായശേഷം സിനിമാരംഗത്ത് മക്കളുടെ അവസരങ്ങള്‍ നഷ്ടമായി തുടങ്ങിയെന്ന് കൃഷ്ണകുമാര്‍ പറയുന്നു.
രാഷ്‌ട്രീയം വ്യക്തമാക്കിയതോടെ മക്കള്‍ക്ക് സിനിമാരംഗത്ത് അവസരങ്ങള്‍ കുറഞ്ഞു. ഡേറ്റുകള്‍ മാറുകയും സിനിമകള്‍ നഷ്ടമാകുകയും ചെയ്തു. കുടുംബവും സൈബര്‍ ആക്രമണങ്ങള്‍ക്ക് ഇരയായി. പരിഹസിക്കുമ്പോള്‍ താന്‍ വളരും. അഞ്ചോ, പത്തോവര്‍ഷം കഴിയുമ്പോള്‍ താന്‍ വളര്‍ന്ന് മുകളിലോട്ട് പോകും.
അപ്പോഴും ഇതേ ട്രോളും സൈബര്‍ ആക്രമണവുമായി വളര്‍ച്ചയില്ലാതെ നിങ്ങള്‍ അവിടെ തന്നെ കാണുമെന്നും ട്രോളുന്നവരോടുള്ള മറുപടിയായി അദ്ദേഹം പറഞ്ഞു. വോട്ടെടുപ്പ് കഴിഞ്ഞതോടെ സീരിയലുകളുടെ ഷെഡ്യൂളുകളാണ് പൂര്‍ത്തിയാക്കാന്‍ ആരംഭിച്ചരിക്കുന്നത്. മെയ് രണ്ട് അനുകൂലമാകുമെന്ന പ്രതീക്ഷയും അദ്ദേഹം പങ്കുവച്ചു.
പ്രതികരിക്കാൻ ഇവിടെ എഴുതുക: