എല്ഡിഎഫും യുഡിഎഫും ഒരേ കള്ളനാണയത്തിന്റെ ഇരുവശങ്ങളാണെന്ന് കേള്ക്കാന് തുടങ്ങിയിട്ട് കാലമേറെയായി. നയവും പരിപാടികളും ഭരണരീതികളും സമാനം. സ്വര്ണക്കടത്തും ഡോളര്കച്ചവടവും അഴിമതിയും കൊണ്ട് കെട്ടുനാറിയ ഭരണമായിരുന്നു ഇടതുപക്ഷത്തിന്റേത്. അതിനേക്കാള് ഭീകരമായ കൊള്ളരുതായ്മകള് കാട്ടിയതാണ് യുഡിഎഫ് ഭരണം. അതിനൊരന്ത്യം കുറിക്കും.
എല്ഡിഎഫ് വരട്ടെ എല്ലാം ശരിയാക്കുമെന്ന് വാക്ക് നല്കിയവര് കൊള്ളരുതായ്മയുടെ പുതിയ മേഖലകള് തുറക്കുകയായിരുന്നു. അഴിമതി അവസാനിപ്പിക്കുന്ന വാക്ക് പാലിക്കാനേ കഴിഞ്ഞില്ല. അഴിമതി അന്വേഷണം പോലും അനുവദിക്കില്ലെന്ന നിലപാടാണ് ഇപ്പോള് കാണുന്നത്.
ഈനാംപേച്ചിക്ക് മരപ്പട്ടി കൂട്ട് എന്ന് പറയാറില്ലെ. അതുപോലെയാണ് കോണ്ഗ്രസും കമ്മ്യൂണിസ്റ്റ് പാര്ട്ടിയും. കേരളത്തില് പരസ്പരം മല്ലടിക്കുകയാണെന്ന തോന്നലുണ്ടാക്കും. എന്നാല് പല മണ്ഡലങ്ങളിലും ഒരേ മനസ്സാണ്. നേമത്തിന്റെ കാര്യമെടുത്താല് അത് ബോധ്യമാകും. നേമത്തെ ബിജെപിയുടെ അക്കൗണ്ട് ഇത്തവണ ക്ലോസ് ചെയ്യിക്കുമെന്നാണ് പിണറായി ആവര്ത്തിക്കുന്നത്. നേമത്ത് ജയിക്കുമെന്ന് കോണ്ഗ്രസ് സ്ഥാനാര്ഥിയും പറയുന്നു. ഇരുമുന്നണികളുടെയും കണ്ണ് നേമത്ത് ഊന്നുമ്പോള് അടിയൊഴുക്ക് വ്യക്തമാണ്. കഴിഞ്ഞ തവണ മൂന്നാംസ്ഥാനത്തേക്ക് തള്ളപ്പെട്ട യുഡിഎഫ് എങ്ങനെയാണ് ഇക്കുറി ഒന്നാമതെത്തുമെന്ന് പ്രതീക്ഷിക്കുന്നത്. നേമത്ത് ജയിച്ചാല് പാര്ലമെന്റിലേക്കില്ലെന്നാണ് മുരളീധരന് പറയുന്നത്. അച്ഛന് ബാക്കിവച്ച കടം വീട്ടണമത്രെ.
കെ. കരുണാകരന് നേമത്തും മാളയിലും വിജയിച്ചിരുന്നു. ഒടുവില് നേമം കൈയൊഴിഞ്ഞു. മാള തന്റെ പതിവ്രതയായ ഭാര്യയാണെന്നാണ് പറഞ്ഞ ന്യായം. മുരളി പാര്ലമെന്റിലേക്ക് ഇനി പോവില്ലെന്ന് ഉറപ്പാണെങ്കില് ആ സ്ഥാനം രാജിവച്ച് മത്സരിച്ചാല് പോരേ? നേമത്ത് ജയിച്ച് രാജിവച്ചാല് വടകരയില് കോണ്ഗ്രസിന് സ്ഥാനാര്ഥി ഉണ്ടാവുമോ? അക്കാര്യത്തില് കോണ്ഗ്രസും സിപിഎമ്മും തമ്മിലുള്ള ഡീല് എന്താണ്? പാര്ലമെന്റില് രണ്ട് പാര്ട്ടികള്ക്കും ഒരേ നിലപാടല്ലേ? ഒരു വെച്ചുമാറല് സംശയിച്ചാല് തെറ്റ് പറയാനാകുമോ? എന്ത് വെച്ചുമാറല് നടന്നാലും നേമത്ത് അഞ്ച് വര്ഷം മുമ്പുണ്ടായ ജനവിധി മാറാന് പോകുന്നില്ലെന്ന് കുറിച്ചിട്ടേക്കൂ.
കമ്മ്യൂണിസ്റ്റുകാരും കോണ്ഗ്രസുകാരും ലയിക്കട്ടെ എന്ന പ്രധാനമന്ത്രിയുടെ പ്രസ്താവത്തെ പരിഹസിക്കാന് ചെന്നിത്തല തുനിഞ്ഞിറങ്ങിയിട്ടുണ്ട്. രാജ്യത്താകമാനമുള്ള കോണ്ഗ്രസ്-മാര്ക്സിസ്റ്റ് പെരുമാറ്റമാണ് പ്രധാനമന്ത്രി സൂചിപ്പിച്ചത്. ബംഗാളില്, തമിഴ്നാട്ടില്, ആസാമില് ഒരുമിച്ചല്ലേ രണ്ടുകൂട്ടരും?
കേരളത്തില് തൂക്ക് സഭയാകുമെന്ന് പ്രചരിക്കുന്നുണ്ട്. അങ്ങനെവന്നാല് കോണ്ഗ്രസ്-സിപിഎം സഖ്യമുണ്ടാവില്ലെന്ന് ഉറപ്പുണ്ടോ? മുസ്ലിംലീഗ് ആരോടൊപ്പമാകും? ലീഗിനെ കൂട്ടില്ലെന്ന് സിപിഎമ്മിന് പറയാമോ? എന്തും സംഭവിക്കാം.
ജന്മഭൂമി ഓണ്ലൈന്