ആഗ്ര: താജ്മഹലില് ബോംബ് വച്ചിട്ടുണ്ടെന്ന് അജ്ഞാത ഫോണ് സന്ദേശം ലഭിച്ചതിനെത്തുടര്ന്ന് ആളുകളെ ഒഴിപ്പിച്ചു. ഇതേത്തുടര്ന്ന് അതീവ ജാഗ്രതാ നിര്ദേശമാണ് മേഖലയില് പുറപ്പെടുവിച്ചിട്ടുള്ളത്. താജ്മഹലിന്റെ സുരക്ഷാ വിഭാഗത്തിന് ഇന്ന് രാവിലെയാണ് സന്ദേശം ലഭിച്ചത്. സിഐഎസ്എഫും ആഗ്രാ പോലീസും സംയുക്തമായി പരിശോധന നടത്തിയെങ്കിലും സ്ഫോടക വസ്തുക്കളൊന്നും കണ്ടുകിട്ടിയില്ല. ബോംബ് സ്ക്വാഡും താജ്മഹലിലെത്തിയിരുന്നു.
ആയിരക്കണക്കിന് സഞ്ചാരികള് താജ്മഹലിനകത്ത് ഉണ്ടായിരിക്കെയാണ് ഭീഷണി സന്ദേശം ലഭിച്ചത്. വിനോദ സഞ്ചാരികളെ ഒഴപ്പിക്കുകയും താജ്മഹലിലേക്കുള്ള പ്രധാന വാതിലുകള് അടക്കുകയും ചെയ്തു. ഫോണ് സന്ദേശം എവിടെ നിന്നാണെന്നത് വ്യക്തമല്ല. ബോംബ് കണ്ടെത്താനുള്ള പരിശോധന പുരോഗമിച്ചു വരികയാണ്.
