കൊച്ചി : വിദേശത്തേയ്ക്കുള്ള ഡോളര്‍ കടത്ത് കേസുമായി ബന്ധപ്പെട്ട് യുണിടാക് ഉടമ സന്തോഷ് ഈപ്പനെ കസ്റ്റംസ് അറസ്റ്റ് ചെയ്തു. ഇന്ന് രാവിലെ പത്ത് മണി മുതല്‍ ചോദ്യം ചെയ്തതിന് ശേഷമാണ് സന്തോഷ് ഈപ്പനെ അറസ്റ്റ് ചെയ്തത്.
അനധികൃതമായി ഡോളര്‍ സംഘടിപ്പിച്ചത് സന്തോഷ് ഈപ്പന്റെ നേതൃത്വത്തിലാണെന്ന് ചോദ്യം ചെയ്യലില്‍ വ്യക്തമായതിനെ തുടര്‍ന്നാണ് നടപടി. യുഎഇ കോണ്‍സുലേറ്റിലെ അക്കൗണ്ടന്റായ ഈജിപ്ഷ്യന്‍ പൗരന്‍ ഖാലിദിന് നല്‍കുന്നതിനായി വടക്കാഞ്ചേരി ലൈഫ്മിഷന്‍ ഭവന നിര്‍മ്മാണ കരാര്‍ നേടിയെടുത്ത സന്തോഷ് ഈപ്പന്‍ കരിഞ്ചന്തയില്‍ ഡോളര്‍ വാങ്ങിയതായി സ്വപ്ന സുരേഷ് ഉള്‍പ്പെടെയുള്ള പ്രതികള്‍ മൊഴി നല്‍കിയിരുന്നു.
ലൈഫ് മിഷനിലെ കോഴപ്പണമാണ് ഡോളറാക്കി മാറ്റി വിദേശത്തേക്ക് കടത്തിയത്. കഴിഞ്ഞ ഓഗസ്റ്റ് മാസത്തിലാണ് 1.90 ലക്ഷം ഡോളര്‍ വിദേശത്തേക്ക് കടത്തിയെന്നാണ് കസ്റ്റംസിന്റെ കണ്ടെത്തല്‍. അതേസമയം സന്തോഷ് ഈപ്പനെതിരെ നിരവധി തെളിവുകളും കസ്റ്റംസിന് ലഭിച്ചെന്നാണ് വിവരം.
കസ്റ്റംസ് രജിസ്റ്റര്‍ ചെയ്ത ഡോളര്‍ കടത്ത് കേസില്‍ സ്വപ്ന, സരിത്, എം ശിവശങ്കര്‍, ഖാലിദ് എന്നിവരാണ് മുഖ്യ പ്രതികള്‍. ഇദ്ദേഹത്തെ ഉടന്‍ കോടതിയില്‍ ഹാജരാക്കുമെന്നാണ് വിവരം.
പ്രതികരിക്കാൻ ഇവിടെ എഴുതുക: