കോട്ടയം : കോളിളക്കം സൃഷ്ടിച്ച വിതുര പെണ്വാണിഭ കേസിലെ ഒന്നാം പ്രതി സുരേഷ് കുറ്റക്കാരനെന്ന് കോടതി. ശിക്ഷ നാളെ വിധിക്കും. സംഭവവുമായി ബന്ധപ്പെട്ട 24 കേസുകളില് ഒന്നിലാണ് വിധി പറഞ്ഞത്. അനാശാസ്യം, പെണ്കുട്ടിയെ ആളുകള്ക്ക് കൈമാറല് എന്നീ കുറ്റങ്ങള് നിലനില്ക്കുമെന്ന് കോട്ടയം ജില്ലാ അഡീഷണല് സെഷന്സ് കോടതി അറിയിച്ചു.
1996ല് സംഭവം നടന്നതിന് ശേഷം ഒളിവിലായിരുന്ന ഇയാള് കേസിലെ മറ്റ് പ്രതികളെ കോടതി വെറുതെ വിട്ട സാഹചര്യത്തില് പതിനെട്ട് വര്ഷത്തിന് ശേഷം 2014ല് കീഴടങ്ങിയിരുന്നു. തുടര്ന്ന് ഒരു വര്ഷം ജയില്വാസം അനുഭവിച്ച സുരേഷ് ജാമ്യത്തിലിറങ്ങി. രണ്ട് മാസം മുമ്പ് കേസിന്റെ വിചാരണ ആരംഭിക്കുകയും പെണ്കുട്ടി സുരേഷിനെ തിരിച്ചറിയുകയും ചെയ്തതോടെ ഇയാള് വീണ്ടും ഒളിവില് പോകുകയായിരുന്നു.
തുടര്ന്ന് 21 കേസുകളില് ഇയാളെ പിടികിട്ടാപ്പുള്ളിയായി കോടതി പ്രഖ്യാപിക്കുകയും ചെയ്തിരുന്നു. ഹൈദരാബാദില് നിന്നും അറസ്റ്റ് ചെയ്യുകയായിരുന്നു.
പ്രായപൂര്ത്തിയാകാത്ത പെണ്കുട്ടിയെ പീഡനത്തിനിരയാക്കിയെന്നതാണ് സുരേഷിനെതിരെയുള്ള കേസ്. വിതുര സ്വദേശിയായ പെണ്കുട്ടിയെ ജോലി വാഗ്ദാനം ചെയ്ത് സംസ്ഥാനത്തിന്റെ വിവിധ ഭാഗങ്ങളില് കൊണ്ടുപോയി പീഡിപ്പിച്ചെന്നതാണ് കേസ്. ഈ കേസിലെ മറ്റ് പ്രതികളെ കോടതി നേരത്തെ വെറുതെ വിട്ടിരുന്നു.
