ആലപ്പുഴ: പ്രതിപക്ഷ നേതാവ് രമേശ് ചെന്നിത്തലയുടെ ജന്മനാട്ടില്‍ കോണ്‍ഗ്രസിന്റെ പിന്തുണയോടെ സിപിഎം നേടിയെടുത്ത ഗ്രാമപഞ്ചായത്ത് പ്രസിഡന്റ് സ്ഥാനം രാജിവെച്ചു. ഏറെ പ്രതിഷേധങ്ങള്‍ക്കും വിവാദങ്ങള്‍ക്കും ഒടുവിലാണ് നിയമസഭ തെരഞ്ഞെടുപ്പില്‍ കനത്തതിരിച്ചടി ലഭിക്കുമെന്ന് ഭയന്ന് പ്രസിഡന്റ് സ്ഥാനം രാജിവെയ്‌ക്കാന്‍ സിപിഎം തീരുമാനിച്ചത്. ചെന്നിത്തല തൃപ്പെരുന്തുറ ഗ്രാമപഞ്ചായത്ത് പ്രസിഡന്റ് സിപിഐഎമ്മിലെ വിജയമ്മ ഫിലേന്ദ്രന്‍ ഇന്നാണ് ഔദ്യോഗികമായി രാജിസമര്‍പ്പിച്ചത്. പാര്‍ട്ടി ജില്ലാ നേതൃത്വം കഴിഞ്ഞയാഴ്ച തന്നെ ഇതുസംബന്ധിച്ച് തീരുമാനിച്ചിരുന്നെങ്കിലും അഭിപ്രായ വിത്യാസങ്ങളെ തുടര്‍ന്ന് രാജി വൈകുകയായിരുന്നു.
പട്ടികജാതി വനിതയ്‌ക്ക് പ്രസിഡന്റുസ്ഥാനം സംവരണം ചെയ്തിട്ടുള്ള ചെന്നിത്തലയില്‍ ബിജെപിക്കും യുഡിഎഫിനും ആറുസീറ്റുവീതവും സിപിഎമ്മിന് അഞ്ചു സീറ്റുമാണ് ലഭിച്ചിരുന്നത്. യുഡിഎഫില്‍ പട്ടികജാതിവനിത വിജയിച്ചിട്ടില്ലാത്തതിനാല്‍ അവര്‍ക്ക് പ്രസിഡന്റുസ്ഥാനത്തേക്ക് മത്സരിക്കാനായില്ല. എന്നാല്‍, ആറു സീറ്റുള്ള ബിജെപി. അധികാരത്തിലേറുന്നതു തടയാന്‍ സിപിഎം ജില്ലാ നേതൃത്വവും പ്രതിപക്ഷനേതാവ രമേശ് ചെന്നിത്തലയും ഏറ്റെടുത്ത് നടത്തിയ നാടകത്തിന്റെ ഭാഗമാണ് സിപിഎം അധികാരത്തിലെത്തിയത്. വിജയമ്മ ഫിലേന്ദ്രന്‍ രാജിവെച്ചതോടെ ബിജെപിക്ക് പ്രസിഡന്റ് സ്ഥാനം ലഭിക്കും.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: