കൊച്ചി : കേരളത്തില്‍ എത്തിയ ബിജെപി ദേശീയ അധ്യക്ഷന്‍ ജെ.പി. നദ്ദയ്‌ക്ക് പ്രൗഢഗംഭീരമായ വരവേല്‍പ്പ് നല്‍കി കൊച്ചി. തൃശൂരില്‍ ഇന്ന് നടക്കുന്ന പൊതു സമ്മേളനത്തില്‍ പങ്കെടുക്കുന്നതിനായി നെടുമ്പാശ്ശേരിയില്‍ എത്തിയതായിരുന്നു അദ്ദേഹം. ബിജെപി ജില്ലാ നേതാക്കള്‍ ചെണ്ടമേളം താലപ്പൊലി ഉള്‍പ്പടെയുള്ള വന്‍ സ്വീകരണമാണ് നദ്ദയ്‌ക്കായി ഒരുക്കിയത്.
ബിജെപി ദേശീയ അധ്യക്ഷനായി ചുമതലയേറ്റശേഷം നദ്ദ പങ്കെടുക്കുന്ന കേരളത്തിലെ ആദ്യ പൊതു പരിപാടിയാണ് ഇന്ന് തൃശൂരിലേത്. വിമാനത്താവളത്തില്‍ നിന്നും സംസ്ഥാന അധ്യക്ഷന്‍ കെ. സുരേന്ദ്രന്‍, എ.എന്‍. രാധാകൃഷ്ണന്‍ എന്നിവര്‍ക്കൊപ്പം തുറന്ന വാഹനത്തില്‍ സഞ്ചരിച്ച് പാര്‍ട്ടി പ്രവര്‍ത്തകരെ അഭിവാദ്യം ചെയ്തശേഷമാണ് നദ്ദ തൃശൂരിലേക്ക് പോയത്.
ജില്ലാപ്രസിഡന്റ് എസ്. ജയകൃഷ്ണന്‍, പി.എം. വേലായുധന്‍, മഹിള മോര്‍ച്ച സംസ്ഥാന അധ്യക്ഷ പത്മജ എസ്.മേനോന്‍, ബിജെപി ജില്ലാ വെസ് പ്രസിഡന്റ് സജി കുമാര്‍, ജില്ലാ സെക്രട്ടറി സജിനി, എം.എന്‍. ഗോപി, യുവമോര്‍ച്ച ആലുവ മണ്ഡലം പ്രസിഡന്റ് വൈശാഖ് രവീന്ദ്രന്‍, ജില്ലാ ജനറല്‍ സെക്രട്ടറി അഡ്വ. ഷൈജു എന്നിവരും നദ്ദയെ അനുഗമിച്ചു. നദ്ദയ്‌ക്ക് സ്വീകരണം നല്‍കിയശേഷം സ്വീകരണത്തിന് എത്തിവര്‍ പ്രദേശത്ത് ഉപേക്ഷിച്ച കുപ്പികളും മറ്റും പെറുക്കി മാതൃകാപരമായി വൃത്തിയാക്കിയശേഷമാണ് യുവമോര്‍ച്ച പ്രവര്‍ത്തകര്‍ തൃശൂരേയ്‌ക്ക് യാത്ര തിരിച്ചത്.
പ്രതികരിക്കാൻ ഇവിടെ എഴുതുക: