മലപ്പുറം : കത്വ, ഉന്നാവ് കേസുകളുടെ പേരില് പിരിവ് നടത്തി പണം തട്ടിയതായി യൂത്ത് ലീഗ് നേതാവ് പി.കെ. ഫിറോസിനെതിരെ ആരോപണം. യൂത്ത് ലീഗ് ദേശിയ സമിതി അംഗം യൂസഫ് പടനിലമാണ് ആരോപണം ഉന്നയിച്ചിരിക്കുന്നത്. കത്വ, ഉന്നാവ് സംഭവത്തിന് പിന്നാലെ പെണ്കുട്ടികളുടെ കുടുംബത്തെ സഹായിക്കാനെന്ന പേരില് പണം പിരിച്ച് സ്വകാര്യ ആവശ്യങ്ങള്ക്ക് ഉപയോഗിച്ചെന്നാണ് ആരോപണം.
ഇരയുടെ കുടുംബാംഗങ്ങള്ക്കെന്ന പേരില് യൂത്ത്ലീഗ് സംസ്ഥാന നേതൃത്വം ഏപ്രില് 20ന് മുസ്ലിം പള്ളികളില് അടക്കം പിരിവ് നടത്തിയിരുന്നു. ഒരുകോടിയോളം രൂപ ഇത്തരത്തില് പിരിച്ചെടുത്തിട്ടുണ്ട്. എന്നാല് ഇതില് 15 ലക്ഷം രൂപ പി.കെ. ഫിറോസ് 2019ല് നടത്തിയ യുവജന യാത്രയുമായി ബന്ധപ്പെട്ടുണ്ടായ കടം തീര്ക്കാന് ഉപയോഗിച്ചെന്നും യൂസഫ് പടനിലം ആരോപിച്ചു.
ഇത് കൂടാതെ യൂത്ത്ലീഗിലെ അഴിമതി ചോദ്യം ചെയ്ത ഹൈദരലി തങ്ങളുടെ മകന് മുഈനലി തങ്ങളെ അവഹേളിക്കാനും ശ്രമമുണ്ടായി. സി.കെ.സുബൈര്, പി.കെ. ഫിറോസ് എന്നിവര്ക്കെതിരെ അഴിമതി ആരോപണം ഉയര്ന്നിട്ടും മുസ്ലിംലീഗ് സംരക്ഷണം നല്കുകയാണ്. മുമ്പ് രോഹിത് വെമുലയുടെ പേരിലും മുസ്ലിം ലീഗ് പണം പിരിച്ച് തട്ടിപ്പ് നടത്തിയതായി ആരോപണമുണ്ട്. ഗുജറാത്ത് ഭൂകമ്പം. സുനാമി ഫണ്ടുകളിലും ലീഗ് പണപ്പിരിവ് നടത്തിയെങ്കിലും. അതില് ഒരു രൂപപോലും ഇരയായവര്ക്ക് നല്കിയിട്ടില്ല. പണം ലീഗ് നേതൃത്വവും മറ്റും ചെലവഴിക്കുകയാണ് ഉണ്ടായിട്ടുള്ളതെന്നും ആരോപിക്കുന്നുണ്ട്.
യൂത്ത് ലീഗിനെതിരെ ഉയര്ന്നിട്ടുള്ള സാമ്പത്തിക ആരോപണങ്ങള് സംസ്ഥാന തലത്തില് അന്വേഷണം ആവശ്യപ്പെട്ട് വിജിലന്സിനെ സമീപിക്കുമെന്നും പടനിലം അറിയിച്ചു. തദ്ദേശ തെരരഞ്ഞെടുപ്പില് യുഡിഎഫ് സ്ഥാനാര്ത്ഥിക്കെതിരെ വിമതനായി മത്സരിച്ചതിനെ തുടര്ന്ന് അച്ചടക്ക നടപടിയുടെ ഭാഗമായി യൂസഫ് പടനിലത്തെ നിലവില് പാര്ട്ടി സസ്പെന്ഡ് ചെയ്തിരിക്കുകയാണ്.
അതേസമയം പടനിലം ഉന്നയിച്ച ഫണ്ട് തട്ടിപ്പ് മുഈനലി തങ്ങള് ഭാഗികമായി ശരിവെച്ചു. കത്വ, ഉന്നാവ് പെണ്കുട്ടികളുടെ കുടുംബാംഗങ്ങള്ക്കെന്ന പേരില് പിരിച്ച പണം അവര്ക്ക് നല്കിയതായി നേതൃത്വം വ്യക്തമാക്കിയിട്ടില്ല. ഇതിന്റെ കണക്കുകളും പുറത്തുവിട്ടിട്ടില്ല. ഇതുസംബന്ധിച്ച് പി.കെ. കുഞ്ഞാലിക്കുട്ടിക്ക് പരാതി നല്കിയിട്ടും നടപടി സ്വീകരിച്ചിട്ടില്ലെന്നും മുഈനലി കൂട്ടിച്ചേര്ത്തു.
