ന്യൂദല്ഹി: വ്യാജ രേഖകള് ഉപയോഗിച്ച് ഡ്രൈവിങ് ലൈസന്സ് നേടുന്നതിനെതിരെ കര്ശ്ശന നടപടികളുമായ കേന്ദ്ര സര്ക്കാര്. ബിനാമി പേരുകളില് വാഹനങ്ങള് വ്യാപകമായി രജിസ്റ്റര് ചെയ്യുന്നത് ശ്രദ്ധയില് പെട്ടതിനെ തുടര്ന്നാണ് നടപടികള് സ്വീകരിക്കുന്നത്. ഇതിന്റെ ഭാഗമായി ഇനിമുതല് വാഹനങ്ങള് രജിസ്റ്റര് ചെയ്യണമെങ്കില് ആധാര് കാര്ഡ് നിര്ബന്ധമാക്കാനാണ്് കേന്ദ്ര സര്ക്കാരിന്റെ തീരുമാനം.
ഓണ്ലൈന് സേവനങ്ങള് സുരക്ഷിതമാക്കുന്നതിന്റെ ഭാഗമായാണ് നീക്കം. വ്യാപകമായി ബിനാമി പേരുകളില് വാഹനങ്ങള് രജിസ്റ്റര് ചെയ്ത് തട്ടിപ്പ് നടത്തുന്നതായി ശ്രദ്ധയില് പെട്ടിരുന്നു. ഇതിന്റെ ഭാഗമായാണ് നടപടി. കേന്ദ്ര ഇലക്ട്രോണിക്സ് ആന്ഡ് ഇന്ഫര്മേഷന് ടെക്നോളജി മന്ത്രാലയമാണ് മോട്ടോര്വാഹനവകുപ്പിലും ആധാര് നിര്ബന്ധമാക്കാനുള്ള നിര്ദ്ദേശം മുന്നോട്ട് വെച്ചിരിക്കുന്നത്. പുതിയ നിര്ദ്ദേശം നടപ്പാക്കുന്നതിന്റെ ഭാഗമായി കേന്ദ്ര ഉപരിതലഗതാഗതമന്ത്രാലയം സംസ്ഥാന സര്ക്കാരുകളുടെയും പൊതുജനങ്ങളുടെയും അഭിപ്രായം തേടി. ഈ മാസം അവസാനത്തോടെ വിജ്ഞാപനം ഇറക്കാനാണ് സാധ്യത.
ഫോട്ടോപതിച്ച അംഗീകൃത തിരിച്ചറിയല് കാര്ഡുകളുടെ പകര്പ്പുകളാണ് ഇപ്പോള് അപേക്ഷകള്ക്കൊപ്പം സമര്പ്പിക്കേണ്ടത്. ലേണേഴ്സ് ലൈസന്സ്, ലൈസന്സ് പുതുക്കല്, ഡ്യൂപ്ലിക്കേറ്റ് ഡ്രൈവിങ് ലൈസന്സ്, അഡ്രസ് മാറ്റം എന്നിവയ്ക്കും ഇന്റര്നാഷണല് ഡ്രൈവിങ് പെര്മിറ്റിനുമാണ് ആദ്യഘട്ടത്തില് പുതിയ നടപടികള് കൈക്കൊള്ളുന്നത്. ഇതിനൊപ്പം പുതിയ വാഹനങ്ങളുടെ രജിസ്ട്രേഷന്, ഉടമസ്ഥാവകാശ കൈമാറ്റം, അഡ്രസ് മാറ്റം, എതിര്പ്പില്ലാരേഖ എന്നിവയ്ക്കും ഇനി ആധാര് വേണ്ടിവരും.
