കൊച്ചി: പാലാരിവട്ടം പാലം തകര്‍ച്ചയില്‍ കരാര്‍ കമ്പനി 24.52 കോടി രൂപ നഷ്ടപരിഹാരം നല്‍കണമെന്ന് സംസ്ഥാന സര്‍ക്കാര്‍. പാലം പുതുക്കി പണിത ചെലവ് ആവശ്യപ്പെട്ടാണ് ആര്‍ഡിഎസ് കമ്പനിക്ക് സര്‍ക്കാര്‍ നോട്ടീസ് അയച്ചിട്ടുണ്ട്.
പാലം നിര്‍മിച്ചതില്‍ വീഴ്ച പറ്റുകയും ഇത് വീണ്ടും പുതുക്കി പണിയുന്നതിന്റെ നിര്‍മാണ ചെലവ് വേണമെന്നും ആര്‍ഡിഎസ് കമ്പനിയോട് സര്‍ക്കാര്‍ ആവശ്യപ്പെട്ടിട്ടുണ്ട്. പാലം കൃത്യമായി നിര്‍മിക്കുന്നതില്‍ കമ്പനിക്ക് വീഴ്ച പറ്റിയിട്ടുണ്ട്. സംസ്ഥാന സര്‍ക്കാരിന് ഇത് വലിയ ബാധ്യതയാണ് ഉണ്ടാക്കിയിരിക്കുന്നത്. കരാര്‍ വ്യവസ്ഥ അനുസരിച്ച് ആ നഷ്ടം നല്‍കാന്‍ കമ്പനിക്ക് ബാധ്യത ഉണ്ടെന്നും സംസ്ഥാന സര്‍ക്കാര്‍ നോട്ടീസില്‍ പറയുന്നുണ്ട്.
2016 ഒക്ടോബര്‍ 12 നാണ് മുഖ്യമന്ത്രി പിണറായി വിജയന്‍ പാലാരിവട്ടം മേല്‍പ്പാലം യാത്രക്കാര്‍ക്കായി തുറന്ന് കൊടുത്തത്. യുഡിഎഫ് സര്‍ക്കാരിന്റെ കാലത്ത് നിര്‍മാണം പൂര്‍ത്തിയാക്കിയ പാലം മൂന്ന് വര്‍ഷത്തിനുള്ളില്‍ തന്നെ ബലക്ഷയമുള്ളതായി കണ്ടെത്തുകയും ഇത് അടച്ചിടുകയുമായിരുന്നു.
പാലം ജനങ്ങള്‍ക്കായി തുറന്ന് കൊടുത്ത് അധികം വൈകാതെ തന്നെ സ്ലാബുകള്‍ക്കിടയില്‍ വിള്ളലുകള്‍ കണ്ടെത്തുകയായിരുന്നു. ഇത് കൂടാതെ പാലത്തിലെ ടാറിളകി റോഡും തകര്‍ന്ന നിലയിലായിരുന്നു. കേരള റോഡ്‌സ് ആന്‍ഡ് ബ്രിഡ്ജസ് ഡെവലപ്പ്‌മെന്റ്‌സ് കോര്‍പ്പറേഷന്റെ മേല്‍നോട്ടത്തിലായിരുന്നു പാലാരിവട്ടം പാലം നിര്‍മിച്ചത്.
പ്രതികരിക്കാൻ ഇവിടെ എഴുതുക: