റാങ്കിങ്: പൂജാരയ്‌ക്കും രഹാനെയ്‌ക്കും സ്ഥാനക്കയറ്റം

ദുബായ്: ഓസീസ് പര്യടനത്തില്‍ മികച്ച പ്രകടനം കാഴ്ചവച്ച ചേതേശ്വര്‍ പൂജാരയ്‌ക്കും അജിങ്ക്യ രഹാനെയ്‌ക്കും ഐസിസി ടെസ്റ്റ് ബാറ്റ്‌സ്മാന്മാരുടെ റാങ്കിങ്ങില്‍ സ്ഥാനക്കയറ്റം. അതേസമയം ഇന്ത്യന്‍ ക്യാപ്റ്റന്‍ വിരാട് കോഹ്‌ലി നാലാം റാങ്ക് നിലനിര്‍ത്തി.

ചേതേശ്വര്‍ പൂജാര 760 പോയിന്റുമായി ആറാം സ്ഥാനത്തേക്ക് ഉയര്‍ന്നു. രഹാനെ എട്ടാം റാങ്കിലും എത്തി.  748 പോയിന്റാണ് രഹാനെയുടെ സമ്പാദ്യം. ഓസീസിനെതിരായ ആദ്യ ടെസ്റ്റിനുശേഷം പിതൃത്വ അവധിയെടുത്ത കോഹ്‌ലി 862 പോയിന്റോടെയാണ് നാലാം റാങ്ക് നിലനിര്‍ത്തിയത്.

ന്യൂസിലന്‍ഡ് ക്യാപ്റ്റന്‍ കെയ്ന്‍ വില്യംസണ്‍ 919 പോയിന്റുമായി ഒന്നാം റാങ്കില്‍ തുടരുന്നു. ഓസീസിന്റെ മുന്‍ നായകന്‍ സ്റ്റീവ് സ്മിത്താണ് രണ്ടാം സ്ഥാനത്ത്. സ്മിത്തിന് 891 പോയിന്റുണ്ട്. ഓസീസിന്റെ തന്നെ മാര്‍നസ് ലാബുഷെയ്ന്‍ 878 പോയിന്റുമായി മൂന്നാം സ്ഥാനത്തുണ്ട്്.  

ബൗളര്‍മാരുടെ റാങ്കിങ്ങില്‍ ഇന്ത്യയുടെ രവിചന്ദ്രന്‍ അശ്വിന്‍ (760), ജസ്പ്രീത് ബുംറ (757) എന്നിവര്‍ യഥാക്രമം എട്ട്, ഒമ്പത് റാങ്കുകള്‍ നിലനിര്‍ത്തി. ഓസീസ് പേസര്‍ പാറ്റ് കമ്മിന്‍(908) സാണ് ഒന്നാം സ്ഥാനത്ത്. ഇംഗ്ലണ്ടിന്റെ ്‌സ്റ്റുവര്‍ട്ട് ബ്രോഡ് (839), ന്യൂസിലന്‍ഡിന്റെ നീല്‍ വാഗ്നര്‍ (835) എന്നിവരാണ് രണ്ട് , മൂന്ന്് റാങ്കുകളില്‍.