വി സിനിമാസ് ഇന്റര്‍നഷണലിന്റെ ‘ഓപ്പറേഷന്‍ ജാവ’യുടെ പുതിയ വീഡിയോ പുറത്ത്. പേര് പോലെ തന്നെ പോലീസിന്റെ കഥയാണ് ഇതിലൂടെ പറയുന്നത്. നവാഗതനായ തരുണ്‍ മൂര്‍ത്തി രചനയും സംവിധാനവും നിര്‍വ്വഹിക്കുന്ന ചിത്രത്തില്‍ കേരള പോലീസിലെ ചില ഉദ്യോഗസ്ഥരും ഭാഗമാകുന്നുണ്ട്.
കേരള പോലീസിന്റെ കണ്‍ട്രോള്‍ റൂം എസ്‌ഐ ജേക്കബ് മാണിയും, സീനിയര്‍ സിപിഒ ശ്രീജിത്ത് ഇടവനയുമാണ് പുതിയ വീഡിയോയില്‍ പ്രത്യക്ഷപ്പെടുന്നത്. വയര്‍ലെസ് ശബ്ദം റെക്കോര്‍ഡ് ചെയ്യുന്ന വീഡിയോയാണ് അണിയറ പ്രവര്‍ത്തകര്‍ പുറത്തുവിട്ടത്.
ഇതാദ്യമായാണ് കേരള പോലീസിലെ ഉദ്യോഗസ്ഥര്‍ മലയാള സിനിമയുടെ പ്രവര്‍ത്തനങ്ങളില്‍ നേരിട്ട് ഭാഗമാകുന്നത്. ഒരു പോലീസ് കണ്‍ട്രോള്‍ റൂമും അവിടുത്തെ വയര്‍ലെസ് സന്ദേശങ്ങളും യാഥാര്‍ത്ഥ്യത്തോടെ അവതരിപ്പിയ്‌ക്കുക എന്ന ലക്ഷ്യത്തിലാണ് ഇത്തരത്തില്‍ ഒരു രീതി അവലംബിച്ചതെന്നും അണിയറ പ്രവര്‍ത്തകര്‍ അറിയിച്ചു.
കേരള പോലീസ് എന്നാ സുമ്മാവാ എന്നതൊരു വെറും പറച്ചിലല്ലെന്നാണ് ടീസറും പ്രൊമോ വീഡിയോകകളിലും പറയുന്നത്. പുറത്തു വരുന്ന ഓരോ അപ്‌ഡേറ്റുകളിലും പുലര്‍ത്തുന്ന വ്യത്യസ്തതയാണ് ഓപ്പറേഷന്‍ ജാവ കാണാനായി ജനങ്ങളെ തിയേറ്ററിലേക്ക് പോകാന്‍ പ്രേരിപ്പിക്കുക.
പോലീസ് ഉദ്യോഗസ്ഥരുടെ സഹായത്തോടെയാണ് ഇതിന്റെ തിരക്കഥാ രചന പൂര്‍ത്തിയാക്കിയിരിക്കുന്നത്. പോലീസ് സ്റ്റേഷന്റെ പ്രവര്‍ത്തന രീതികളും, കേസന്വേഷണങ്ങളും കോര്‍ത്തിണക്കി ചില യഥാര്‍ത്ഥ സംഭവങ്ങളെ അടിസ്ഥാനമാക്കിയാണ് ചിത്രം അണിയിച്ചൊരുക്കിയിരിക്കുന്നത്.
ഒറിജിനാലിറ്റി വിട്ടൊരു കളിക്കില്ലെന്നാണ് വീഡിയോ പുറത്ത് അണിയറ പ്രവര്‍ത്തകര്‍ പറയുന്നത്. ഫെബ്രുവരി 12ന് റിലീസ് ചെയ്യുന്ന ചിത്രത്തില്‍ വിനായകന്‍, ഇര്‍ഷാദ്, ബിനു പപ്പു, ലുക്ക്മാന്‍, ബാലു വര്‍ഗീസ് തുടങ്ങിയവരാണ് അഭിനേതാക്കള്‍. വാര്‍ത്ത പ്രചരണം- എഎസ് ദിനേശ്.
പ്രതികരിക്കാൻ ഇവിടെ എഴുതുക: