കാസര്‍കോട്: കാസര്‍കോട് നഗരത്തില്‍ മര്‍ദനമേറ്റ് ചെമ്മനാട് സ്വദേശി റഫീഖ് മരിച്ചു. സ്ത്രീയെ അപമാനിച്ചുവെന്ന് ആരോപിച്ചായിരുന്നു മര്‍ദനം. മര്‍ദനമാണോ മരണാകരണമെന്ന് വ്യക്തമായിട്ടില്ലെന്ന് പൊലീസ് അറിയിച്ചു. ഇന്ന് ഉച്ചയ്‌ക്ക് രണ്ടുമണിയോടെ കാസര്‍കോട് നഗരത്തിലെ സ്വകാര്യ ആശുപത്രിയില്‍വച്ച് സ്ത്രീയോട് അപമര്യാദയായി പെരുമാറുകയും നഗ്നതാ പ്രദര്‍ശനം നടത്തുകയും ചെയ്തുവെന്നാണ് ആരോപണം. ആദ്യം ആശുപത്രി ജീവനക്കാരാണ് ഇയാളെ കയ്യേറ്റം ചെയ്തത്.
തുടര്‍ന്ന് പുറത്തേക്ക് ഓടി രക്ഷപെട്ട ഇയാളെ പിന്തുടര്‍ന്ന് നാട്ടുകാരും സമീപമുണ്ടായിരുന്ന ഓട്ടോറിക്ഷ തൊഴിലാളികളും ക്രൂരമായി മര്‍ദിക്കുകയായിരുന്നുവെന്നാണ് റിപ്പോര്‍ട്ട്. അരക്കിലോമീറ്ററോളം പിന്തുടര്‍ന്ന് ഓടിച്ചിട്ട് പിടിച്ചായിരുന്നു മര്‍ദനം. തുടര്‍ന്ന് മര്‍ദനമേറ്റ് റഫീഖ് കുഴഞ്ഞുവീണതിനെ തുടര്‍ന്ന് ചിലര്‍ പിന്‍മാറിയെങ്കിലും അഭിനയമാണെന്ന് ചൂണ്ടിക്കാട്ടി വീണ്ടും മറ്റുചിലര്‍ മര്‍ദനം തുടര്‍ന്നു.
വായില്‍ നുരയും പതയും കണ്ടതോടെ ആശുപത്രിയിലെത്തിച്ചുവെങ്കിലും രക്ഷിക്കാനായില്ല. മര്‍ദനമേറ്റിട്ടുണ്ടെങ്കിലും ഇതു തന്നെയാണോ മരണകാരണമെന്ന് ഉറപ്പിക്കാനായിട്ടില്ലെന്ന് പൊലീസ് വിശദീകരിച്ചു. അന്‍പതിനോട് അടുത്ത് പ്രായമുള്ളതിനാല്‍ ഹൃദായാഘാതം പോലുള്ള സാധ്യതകളും പരിശോധിക്കുന്നുണ്ട്.
മൃതദേഹം കാസര്‍കോട് ജനറല്‍ ആശുപത്രിയില്‍. അപമാനിക്കാന്‍ ശ്രമിച്ചുവെന്ന പരാതിയില്‍ റഫീഖിനെതിരെയും അസ്വാഭാവിക മരണത്തിന് കണ്ടാലറിയാവുന്നവര്‍ക്കെതിരെയും കേസ് എടുത്തിട്ടുണ്ട്. പരിയാരം മെഡിക്കല്‍ കോളജില്‍ എത്തിച്ച് പോസ്റ്റ്‌മോര്‍ട്ടം നടപടികളടക്കം പൂര്‍ത്തിയാക്കും.
പ്രതികരിക്കാൻ ഇവിടെ എഴുതുക: