ന്യൂദല്ഹി: ആഗോള തലത്തില് തന്നെ കോവിഡിന് വാക്സിന് നല്കുന്ന പരിശ്രമങ്ങളില് ഇന്ത്യ ലോകത്തിന് മാതൃകയാകുമെന്ന് മുന് ഇന്ഫോസിസ് സിഇഒ നന്ദന് നിലേക്കാനി.
കോവിഡ് രോഗപ്രതിരോധ പദ്ധതി ഡിജിറ്റല്വല്ക്കരിച്ച ഇന്ത്യ അടുത്ത ആറുമാസക്കാലത്തിനുള്ളില് കൂടുതല് വാക്സിനുകള് നിര്മ്മിക്കുമെന്നും അദ്ദേഹം പറഞ്ഞു. ‘വന്തോതില് വാക്സിന് നല്കുന്ന പരിശ്രമങ്ങളില് അതിവേഗം ചുവടുവെച്ച ഇന്ത്യ മാതൃകയാവും. വാക്സിന് എടുത്തവര്ക്ക് ഡിജിറ്റല് വാക്സിന് സര്ട്ടിഫിക്കറ്റുകള് നല്കുന്ന പദ്ധതി ആദ്യമായി നടപ്പാക്കിയ രാജ്യങ്ങളിലൊന്നായി മാറി ഇന്ത്യ. ഇത് ഇന്ത്യയിലെ ജനങ്ങള്ക്ക് വലിയ സഹായമാകും. ശരിയായ രീതിയില് എല്ലാ കാര്യങ്ങളും ചെയ്താല് ഭാവിയില് 100 കോടി ജനങ്ങള്ക്ക് വേഗത്തില്, വിശ്വസനീയമായ രീതിയില് വാക്സിന് നല്കിയതിന്റെ പേരില് ഇന്ത്യ മാതൃകയായി മാറും,’ നിലേക്കാനി പറഞ്ഞു. റെഡ്സീര്സ് ഗ്രൗണ്ട് സീറോ 4 പരിപാടിയില് സംസാരിക്കുകയായിരുന്നു നിലേക്കാനി.
‘കോവിഡിന് ശേഷം ജനങ്ങള്ക്കിടയില് ഡേറ്റ ഉപയോഗത്തില് വന് കുതിച്ചുചാട്ടുമുണ്ടാകും. കൂടുതല് വിലകുറഞ്ഞ സ്മാര്ട്ട് ഫോണുകള് എത്തും. കൂടുതല് ആളുകള് ഇന്റര്നെറ്റ് ഉപയോഗിക്കാന് തുടങ്ങും,’ കോവിഡാനന്തര വിപണിയെ വിലയിരുത്തിക്കൊണ്ട് നന്ദന് നിലേക്കാനി പറഞ്ഞു. ഇപ്പോഴേ ഇ-ലേണിംഗ്, ടെലിമെഡിസിന്, ഇ-കൊമേഴ്സ് രംഗത്ത് വന്കുതിച്ചു ചാട്ടമുണ്ടായെന്നും നന്ദന് നിലേക്കാനി പറഞ്ഞു.
