കൊല്ലം: ജില്ലയില്‍ കോവിഡ് രോഗവ്യാപന സ്ഥിതി വിലയിരുത്താനായി പൊതുജനങ്ങളുടെ ഇടയില്‍ സീറോളജിക്കല്‍ സര്‍വ്വേ ആരംഭിക്കുമെന്ന് ജില്ലാ മെഡിക്കല്‍ ഓഫീസര്‍ ഡോ. ആര്‍. ശ്രീലത. ആദ്യഘട്ടത്തില്‍ 1000 പേരുടെ സാമ്പിളുകളാണ് ശേഖരിക്കുക. പാരിപ്പള്ളി സര്‍ക്കാര്‍ മെഡിക്കല്‍ കോളജിലും ജില്ലാ പബ്ലിക് ഹെല്‍ത്ത് ലാബിലുമാണ് സാമ്പിളുകള്‍ പരിശോധിക്കുക. സാമ്പിളുകള്‍ ശേഖരിക്കാനായി ലബോറട്ടറി ടെക്നീഷ്യന്‍, സ്റ്റാഫ് നഴ്സ്, ഡാറ്റാ എന്‍ട്രി ഓപ്പറേറ്റര്‍ എന്നിവര്‍ക്ക് പരിശീലനം നല്‍കിത്തുടങ്ങി.
ജില്ലയിലെ തദ്ദേശസ്വയംഭരണ സ്ഥാപനങ്ങളില്‍ നിന്നും നറുക്കെടുപ്പിലൂടെ തെരഞ്ഞെടുത്ത കരുനാഗപ്പള്ളി മുനിസിപ്പാലിറ്റി, നെടുമ്പന, നെടുവത്തൂര്‍, മയ്യനാട്, തേവലക്കര, ക്ലാപ്പന, വെളിയം, ആലപ്പാട്, ആദിച്ചനല്ലൂര്‍, നീണ്ടകര, ശൂരനാട് സൗത്ത്, അലയമണ്‍, പിറവന്തൂര്‍, തൃക്കരുവ, ചാത്തന്നൂര്‍ എന്നീ പഞ്ചായത്തുകളിലുമാണ് ആദ്യഘട്ട പഠനം നടത്തുക. തെരഞ്ഞെടുത്ത തദ്ദേശസ്ഥാപനങ്ങളില്‍ ഒരോന്നില്‍ നിന്നും നാല് വാര്‍ഡുകള്‍ വീതം തെരഞ്ഞെടുത്ത് ഒരു വാര്‍ഡില്‍ 10 വീടുകള്‍ വീതമാണ് സര്‍വ്വേയില്‍ ഉള്‍പ്പെടുത്തുക. തെരഞ്ഞെടുത്ത വീടുകളിലെ 18 വയസിന് മുകളില്‍ പ്രായമുള്ള എല്ലാവരുടെയും രക്ത സാമ്പിളുകള്‍ പരിശോധനയ്‌ക്കായി ശേഖരിച്ച് 31നകം പരിശോധിക്കും.
പരിശോധനയില്‍ രക്തത്തിലെ കോവിഡ് വൈറസിനെതിരെയുള്ള ആന്റിബോഡിയുടെ സാന്നിധ്യമാണ് കണ്ടെത്തുക. ഇതിലൂടെ സമൂഹത്തിലെ രോഗവ്യാപന തോതും ജനങ്ങളുടെ പ്രതിരോധശേഷിയും വിലയിരുത്തും. പൊതുജനങ്ങള്‍ക്ക് കോവിഡ് വാക്സിന്‍ നല്‍കുന്നതിന് മുന്നോടിയായി നടത്തുന്ന ഈ സര്‍വ്വേയ്‌ക്ക് പുറമേ വാക്സിന്‍ സ്വീകരിച്ചു കഴിയുമ്പോഴും തുടര്‍ സീറോളജിക്കല്‍ സര്‍വ്വേകള്‍ ഉണ്ടാകുമെന്നും ആരോഗ്യവകുപ്പ് അറിയിച്ചു.
പ്രതികരിക്കാൻ ഇവിടെ എഴുതുക: