കരുനാഗപ്പള്ളി: മോഹന്‍ലാലിന്റ പുതിയ ചിത്രമായ ആറാട്ടിന്റെ സെറ്റില്‍ കുരുത്തോല കൊണ്ട് വിസ്മയം തീര്‍ക്കുകയാണ് കരുനാഗപ്പള്ളി ആദിനാട് പുത്തന്‍വീട്ടില്‍ ശാസ്ത്രം കുട്ടന്‍ എന്ന കൃഷ്ണന്‍കുട്ടി. നാട്ടുജോലികള്‍ ചെയ്ത് ജീവിക്കുന്ന കൃഷ്ണന്‍കുട്ടി കുരുത്തോലയും വര്‍ണ്ണചിത്രങ്ങളും കൊണ്ട് കമനീയമായ അലങ്കാരങ്ങള്‍ ഒരുക്കാന്‍ വിദഗ്ധനാണ്.
ആദിനാട് ശക്തികുളങ്ങര ശ്രീ ഭഗവതീക്ഷേത്രത്തിലെ ഉത്സവം ഉള്‍പ്പെടെ വിശേഷദിവസങ്ങളില്‍ കുരുത്തോലയും വര്‍ണ്ണചിത്രങ്ങളും ഉപയോഗിച്ച് വേറിട്ടരീതിയില്‍ വര്‍ഷങ്ങളായി അലങ്കാരം നടത്തുന്നത് കൃഷ്ണന്‍കുട്ടിയാണ്. ഇത് സോഷ്യല്‍ മീഡിയയിലൂടെ ശ്രദ്ധയില്‍പ്പെട്ട പലരും അലങ്കാരത്തിന് സമീപിച്ചിട്ടുണ്ട്. കുരുത്തോലയിലെ വര്‍ക്കുകള്‍ ശ്രദ്ധയില്‍പ്പെട്ട മോഹല്‍ലാല്‍ ചിത്രത്തിന്റെ അണിയറക്കാര്‍ ആറാട്ട് സിനിമയിലെ വര്‍ക്കിനായി ഇദ്ദേഹത്തെ ക്ഷണിച്ചു. ഉദയകൃഷ്ണയുടെ തിരക്കഥയില്‍ ബി.ഉണ്ണികൃഷ്ണന്‍ സംവിധാനം ചെയ്യുന്ന ചിത്രത്തിന്റെ ചിത്രീകരണം ഒറ്റപ്പാലം വരിക്കാശ്ശേരി മനയിലാണ്. ഇവിടെയാണിപ്പോള്‍ കൃഷ്ണന്‍കുട്ടിയും.
മഹാനടനായ മോഹന്‍ലാലിന്റെ ചിത്രത്തിന്റെ ഭാഗമാകാന്‍ കഴിഞ്ഞത് ഭാഗ്യമായി കരുതുന്ന ഇദ്ദേഹം ശക്തികുളങ്ങര അമ്മയുടെ അനുഗ്രഹത്തെയും സ്മരിക്കുന്നു. അലങ്കാരങ്ങള്‍ ഒരുക്കാനുള്ള കുരുത്തോല ഉള്‍പ്പെടെ ഉള്ള സാധനങ്ങളുമായി മനയിലെത്തിയ ശാസ്ത്രം കുട്ടന്‍ ആവേശത്തിലാണ്. പ്രസന്നയാണ് കൃഷ്ണന്‍കുട്ടിയുടെ ഭാര്യ. പ്രവീഷ്, പ്രിയ എന്നിവര്‍ മക്കള്‍.
എം.ഡി. ബാബുരഞ്ജിത്
പ്രതികരിക്കാൻ ഇവിടെ എഴുതുക: