ഇടുക്കി: കാലം തെറ്റിയെത്തിയ മഴ വിട പറയാന് ദിവസങ്ങള് എടുക്കുമെന്ന് കേന്ദ്ര കാലാവസ്ഥ നിരീക്ഷണ കേന്ദ്രം. 13 വരെ ഒറ്റപ്പെട്ടയിടങ്ങളില് ശക്തമായ മഴ തുടരും. മറ്റിടങ്ങളില് ഇടത്തരം മഴയോ ചാറ്റല് മഴയോ പ്രതീക്ഷിക്കാം.
ഇന്ന് ആറ് ജില്ലകളില് യെല്ലോ അലെര്ട്ടുണ്ട്. തിരുവനന്തപുരം, കൊല്ലം, പത്തനംതിട്ട, ഇടുക്കി, തൃശൂര്, പാലക്കാട് ജില്ലകളിലാണ് അലെര്ട്ട്. നാളെ തിരുവനന്തപുരം, കൊല്ലം, പത്തനംതിട്ട, കോട്ടയം ഇടുക്കി ജില്ലകളിലും യെല്ലോ അലെര്ട്ടുണ്ട്. സാധാരണ നിര്ജീവമായ കിഴക്കന് കാറ്റ് സജീവമാകുകയും ഇത് പടിഞ്ഞാറന് കാറ്റുമായി കേരളത്തിന് മുകളില് വച്ച് ചേരുന്നതുമാണ് നിലവിലെ മഴയ്ക്ക് കാരണം.
ഞെട്ടിച്ച് മഴയുടെ കണക്ക്
സാധാരണയുള്ള ചരിത്രങ്ങള് തിരുത്തി കുറിക്കുകയാണ് പുതുവര്ഷ ആരംഭം തന്നെ. കഴിഞ്ഞ ചൊവ്വാഴ്ച മുതല് കാലം തെറ്റിയെത്തിയ മഴ വരവ് അറിയിച്ചിരുന്നു. മഴയുടെ ഇതുവരെയുള്ള കണക്കുകള് കേന്ദ്ര അന്തരീക്ഷ ശാസ്ത്ര കേന്ദ്രം പുറത്തുവിട്ടിട്ടുണ്ട്.
ഈ മാസം ഇന്നലെ രാവിലെ വരെ സംസ്ഥാനത്ത് 2.7 മി.മീ. മഴ ലഭിക്കേണ്ട സ്ഥാനത്ത് കിട്ടിയതാകട്ടെ 88.6 മി. മീറ്ററും. അതായത് 3180 ശതമാനം കൂടുതല്. കണ്ണൂര്, കാസര്കോട്, കോഴിക്കോട്, മലപ്പുറം ജില്ലകളിലാണ് മഴ ഏറ്റവും അധികം കൂടിയത്. തുലാമഴ 26 ശതമാനം കുറഞ്ഞപ്പോഴാണിത്. മൊത്തം മഴയുടെ രണ്ട് ശതമാനം മാത്രമാണ് ജനുവരി-മെയ് വരെയുള്ള കാലയളവില് ലഭിക്കാറുള്ളത്. നിലവില് തന്നെ ഈ കണക്ക് ഭേദിച്ചു.
ജന്മഭൂമി ഓണ്ലൈന്