ആലപ്പുഴ: ജനവാസമില്ലാത്ത വിശാലമായ പാടശേഖരം ഉണ്ടായിട്ടും ജനസാന്ദ്രതയേറിയ പ്രദേശത്ത് മൊബൈല്‍ ടവര്‍ സ്ഥാപിക്കാനുള്ള നീക്കത്തെക്കുറിച്ച് അന്വേഷിക്കണമെന്ന് സംസ്ഥാന മനുഷ്യാവകാശ കമ്മീഷന്‍. ദേവികുളങ്ങര പഞ്ചായത്തിലാണ് ടവര്‍ സ്ഥാപിക്കുന്നത്. ആലപ്പുഴ ജില്ലാ കളക്ടറും ദേവികുളങ്ങര പഞ്ചായത്ത് സെക്രട്ടറിയും പരാതിയെക്കുറിച്ച് അന്വേഷിച്ച് നാലാഴ്ചയ്‌ക്കകം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ജുഡീഷ്യല്‍ അംഗം പി. മോഹനദാസ് ആവശ്യപ്പെട്ടു.
മൊബൈല്‍ ടവര്‍ സ്ഥാപിക്കാന്‍ ഉദ്ദേശിക്കുന്ന സ്ഥലത്തിനരികില്‍ ഒരു സ്‌കൂള്‍ പ്രവര്‍ത്തിക്കുന്നുണ്ടെന്ന് പി.എസ്. നിധീഷിന്റെ നേതൃത്വത്തില്‍ സമര്‍പ്പിച്ച പരാതിയില്‍ പറയുന്നു. ടവര്‍ സ്ഥാപിക്കുകയാണെന്നറിഞ്ഞതോടെ കുട്ടികള്‍ പരിഭ്രാന്തരാണ്. ആര്‍ഡിഒയ്‌ക്കും കളക്ടര്‍ക്കും പരാതി നല്‍കിയിട്ടും ഫലമുണ്ടായില്ലെന്നും പരാതിയില്‍ പറയുന്നു.
പ്രതികരിക്കാൻ ഇവിടെ എഴുതുക: