തിരുവനന്തപുരം: ചായ കച്ചവടത്തില്‍ നിന്ന് പ്രധാനമന്ത്രി പദവിയിലേക്ക് എത്തിയ നരേന്ദ്രമോദിയുടെ പാത പിന്തുടര്‍ന്ന്‌ കള്ളിക്കാട്‌ ഗ്രാമപഞ്ചായത്തിലും ബിജെപിക്ക്‌ പിന്‍തുടര്‍ച്ചാവകാശി. തിരുവനന്തപുരം ജില്ലയിലെ കള്ളിക്കാട്‌ ഗ്രാമ പഞ്ചായത്ത്‌ പ്രസിഡന്റായി പന്ത ശ്രീകുമാര്‍ അധികാരമേറ്റു.
കള്ളിക്കാട്‌ ഗ്രാമപഞ്ചായത്തിന്റെ അതിര്‍ത്തി ഗ്രാമമായ പന്തയില്‍ കര്‍ഷക കുടുംബത്തില്‍ 1975 ല്‍ കൃഷ്‌ണന്‍നായരുടെയും വാസന്തി അമ്മയുടെയും മകനായി ജനിച്ച പന്ത ശ്രീകുമാര്‍ ആണ്‌ ചായക്കച്ചവടത്തില്‍ നിന്ന് ഗ്രാമപഞ്ചായത്ത്‌ പ്രസിഡന്റ് സ്‌ഥാനത്തേക്ക്‌ എത്തുന്നത്‌. വിദ്യാഭ്യാസകാലത്ത്‌ ആര്‍എസ്‌എസ്‌, എബിവിപി എന്നീ സംഘടനകളില്‍ കൂടി പൊതുപ്രവര്‍ത്തനത്തില്‍ സജീവമായി.
സംഘപരിവാര്‍ പ്രസ്‌ഥാനങ്ങളുടെ താലൂക്ക്‌ തലം വരെയുള്ള ചുമതലകള്‍ വഹിച്ച്‌ ബിജെപിയില്‍ പാറശ്ശാല മണ്‌ഡലം കമ്മറ്റി വരെയുള്ള ചുമതലകളില്‍ എത്തി. നിലവില്‍ ബിജെപി കള്ളിക്കാട്‌ പഞ്ചായത്ത്‌ കമ്മറ്റി പ്രസിഡന്റ് ആണ്‌. ഉപജീവനമാര്‍ഗത്തിനായി നെയ്യാര്‍ഡാം പോലീസ്‌ സ്‌റ്റേഷന്‌ മുന്‍വശത്ത്‌ ചായക്കട നടത്തിവരുന്നു. ബിജെപി കള്ളിക്കാട്‌ പഞ്ചായത്ത്‌ അധ്യക്ഷനായി അഞ്ചിലേറെ തവണ പന്ത ശ്രീകുമാര്‍ ചുമതല വഹിച്ചിട്ടുണ്ട്‌. ജാതിമത രാഷ്‌ട്രീയത്തിനപ്പുറം എല്ലാ വിഭാഗക്കാരെയും ഒരുപോലെ നയിച്ചു കൊണ്ടുപോകുവാന്‍ ഉള്ള അദ്ദേഹത്തിന്റെ കഴിവ്‌ ഇത്തവണ പാര്‍ട്ടിയുടെ ഉജ്ജ്വല വിജയത്തിന്‌ കാരണമായി.
ശബരിമല സ്‌ത്രീപ്രവേശന വിഷയത്തില്‍ വിശ്വാസികളെ മുന്നില്‍ നിന്ന് നയിക്കുവാനും നെയ്യാര്‍ഡാം കുന്നില്‍ മഹാദേവ ക്ഷേത്ര വിഷയത്തില്‍ വിശ്വാസികളുടെ ഒപ്പം നിന്നതിന്‌ പോലീസിന്റെ ക്രൂരമര്‍ദനം ഏറ്റുവാങ്ങുകയും 21 ദിവസം ജയിലില്‍ വാസം അനുഭവിക്കുകയും ചെയ്‌തു. ഇക്കഴിഞ്ഞ തദ്ദേശസ്വയംഭരണ തെരഞ്ഞെടുപ്പില്‍ പന്ത ശ്രീകുമാറിന്റെ നേതൃത്വത്തില്‍ കള്ളിക്കാട്‌ പഞ്ചായത്തില്‍ ബിജെപി ചരിത്ര വിജയം കൊയ്യുകയും കാലാട്ട്‌കാവ്‌ വാര്‍ഡില്‍ ശ്രീകുമാര്‍ നല്ല ഭൂരിപക്ഷത്തില്‍ വിജയിക്കുകയും ചെയ്‌തു. കഴിഞ്ഞ ദിവസം കള്ളിക്കാട്‌ ചേര്‍ന്ന ദേശീയ ജനാധിപത്യ സഖ്യം പഞ്ചായത്ത്‌ പ്രവര്‍ത്തക സമ്മേളനത്തിലാണ്‌ പന്ത ശ്രീകുമാറിനെ ഭരണ സമിതി പ്രസിഡന്റായി തെരഞ്ഞെടുത്തത്‌.
ബിജെപിയുടെ ബിന്ദു രാജേഷാണ്‌ വൈസ്‌ പ്രസിഡന്റ്. സ്ഥാനാരോഹണ ചടങ്ങില്‍ ബിജെപി സംസ്ഥാന സെക്രട്ടറി കരമന ജയന്‍ ഉള്‍പ്പെടെ മുതിര്‍ന്ന എന്‍ഡിഎ നേതാക്കള്‍ പങ്കെടുത്തു.
പ്രതികരിക്കാൻ ഇവിടെ എഴുതുക: