ഗോഹട്ടി: വിദ്യാഭ്യാസത്തെ മതേതരമാക്കാനുള്ള ചരിത്രപരമായ തീരുമാനവുമായി അസം സര്‍ക്കാര്‍. സര്‍ക്കാര്‍ സഹായം നല്‍കുന്ന എല്ലാ മദ്രസകളെയും പൊതു സ്ഥാപനങ്ങളാക്കി മാറ്റുമെന്ന് സംസ്ഥാന വിദ്യാഭ്യാസ മന്ത്രി ഹിമന്ത ബിശ്വ ശര്‍മ്മ പറഞ്ഞു.
ഞായറാഴ്ച എടുത്ത മന്ത്രിസഭാ തീരുമാനം നടപ്പാക്കുന്നതിനായി നിയമസഭയുടെ ശീതകാല സമ്മേളനത്തില്‍ ഉടന്‍ ബില്‍ അവതരിപ്പിക്കുമെന്ന് മന്ത്രി വ്യക്തമാക്കി. ”മദ്രസ” എന്ന വാക്ക് നീക്കം ചെയ്തതിനുശേഷം എല്ലാ ഉയര്‍ന്ന മദ്രസകളും ഇപ്പോള്‍ മതേതരമായിരിക്കും. ഹൈ മദ്രസയല്ല ഹൈസ്‌കൂള്‍ എന്നാണ് അവര്‍ ഇപ്പോള്‍ അറിയപ്പെടുന്നത്. ഇനി ഒരു വ്യത്യാസവുമില്ല. ഇതുവരെ അവര്‍ 90 ശതമാനം പൊതുവിദ്യാഭ്യാസവും 10 ശതമാനം മതപഠനവും നല്‍കിയിരുന്നു. ഖുറാനില്‍ 50 മാര്‍ക്കിന്റെ മതവിഷയം ഉപേക്ഷിക്കപ്പെടും, ‘2022 മുതല്‍ അസമില്‍ ഉയര്‍ന്ന മദ്രസ പരീക്ഷ നടത്തില്ലെന്നും ശര്‍മ്മ പറഞ്ഞു.
സെക്കന്‍ഡറി എജ്യുക്കേഷന്‍ ബോര്‍ഡ് അസം (സെബ) യുടെ കീഴില്‍ 198 ഹൈ മദ്രസ സ്‌കൂളുകളും അസം ഹയര്‍ സെക്കന്‍ഡറി എഡ്യൂക്കേഷന്‍ കൗണ്‍സിലിന് (എഎച്ച്എസ്ഇസി) കീഴില്‍ 542 സ്ഥാപനങ്ങളുമുണ്ട്. ഇതില്‍ നാല് അറബി കോളേജുകളും 138 സീനിയര്‍ മദ്രസകളും 230 പ്രീ-സീനിയര്‍ മദ്രസകളും ഉള്‍പ്പെടുന്നു.
പ്രാഥമിക വിദ്യാഭ്യാസത്തിനും ഉന്നത പഠനത്തിനുമുള്ള ഈ അക്കാദമിക് സ്ഥാപനങ്ങള്‍ ഇന്ത്യയിലെ ഏറ്റവും പഴയ മദ്രസ വിദ്യാഭ്യാസ ബോര്‍ഡായി കണക്കാക്കപ്പെടുന്ന സ്റ്റേറ്റ് മദ്രസ ബോര്‍ഡിന് കീഴില്‍ പ്രവര്‍ത്തിക്കുന്നു.
മന്ത്രിസഭാ തീരുമാനമനുസരിച്ച് സംസ്ഥാന മദ്രസ ബോര്‍ഡ് പിരിച്ചുവിടുമെന്നും ഈ ബോര്‍ഡിന് കീഴിലുള്ള അക്കാദമിക്, അഡ്മിനിസ്‌ട്രേറ്റീവ് അതോറിറ്റികളെ ‘ഡയറക്ടര്‍ സെക്കന്‍ഡറി എഡ്യൂക്കേഷന്‍’ എന്ന് പുനര്‍നാമകരണം ചെയ്യുമെന്നും ശര്‍മ്മ പ്രഖ്യാപിച്ചു. അതേസമയം, നിയമത്തെ എതിര്‍ക്കുമെന്നു കോണ്‍ഗ്രസും എഐയുഡിഎഫും അറിയിച്ചു.
പ്രതികരിക്കാൻ ഇവിടെ എഴുതുക: