തൃശൂര് : ജീവനക്കാര്ക്ക് കോറോണ വൈറസ് സ്ഥിരീകരിച്ചതിന്റെ പശ്ചാത്തലത്തില് ഇന്ന് മുതല് ഗുരുവായൂര് ക്ഷേത്രത്തില് ഭക്തര് പ്രവേശിക്കുന്നതിന് വിലക്ക്. ക്ഷേത്രം സഹപൂജാരിമാര് ഉള്പ്പടെ 46 ജീവനക്കാര്ക്ക് കോവിഡ് സ്ഥിരീകരിച്ചതിന്റെ പശ്ചാത്തലത്തിലാണ് താത്കാലികമായി ഭക്തരുടെ പ്രവേശനത്തിന് വിലക്ക് ഏര്പ്പെടുത്തിയിരിക്കുന്നത്.
കഴിഞ്ഞ ദിവസം ജിവനക്കാര്ക്കിടയില് നടത്തിയ വ്യാപക പരിശോധനയിലാണ് രോഗം സ്ഥിരീകരിച്ചിട്ടുള്ളത്. തുടര്ന്ന് ഭക്തര്ക്ക് വിലക്കേര്പ്പെടുത്താനുള്ള തീരുമാനം ദേവസ്വം ബോര്ഡിന്റേതാണ്. രണ്ടാഴ്ചത്തേയ്ക്കാണ് വിലക്ക്. ക്ഷേത്രവും പരിസരവും കണ്ടയ്ന്മെന്റ് സോണാക്കി പ്രഖ്യാപിച്ചിട്ടുണ്ട്. പൂജകളും ചടങ്ങുകളും പതിവുപോലെ നടക്കുമെന്ന് ദേവസ്വം ബോര്ഡ് അംഗങ്ങള് അറിയിച്ചിട്ടുണ്ട്.
ക്ഷേത്ര ജീവനക്കാര്ക്കിടയിലെ രോഗവ്യാപനം കണ്ടെത്തിയതോടെ ജില്ലാ കളക്ടര് ദേവസ്വം അധികൃതരുമായി അടിയന്തിര ചര്ച്ച നടത്തി.അതേസമയം ഇന്ന് നടത്താന് നിശ്ചയിച്ചിരുന്ന വിവാഹങ്ങള് മാത്രം കര്ശന നിയന്ത്രണങ്ങളോടെ നടത്തുമെന്ന് അധികൃതര് അറിയിച്ചിട്ടുണ്ട്. എന്നാല് ദീപസ്തംഭത്തിന് മുന്നില് തൊഴാനുള്ള അവസരവും ഉണ്ടാവില്ല. നടപ്പന്തലുകള് അടച്ചിടും. തുലാഭാരമടക്കമുള്ള മറ്റു വഴിപാടുകളും നിര്ത്തിവച്ചു.
ക്ഷേത്രത്തിലെ മുഴുവന് ക്ഷേത്ര ജീവനക്കാരെയും മൂന്ന് ദിവസത്തിനകം പരിശോധനയ്ക്ക് വിധേയമാക്കാന് തീരുമാനിച്ചു. കൂടാതെ മാസത്തിലൊരിക്കല് മുഴുവന് ജീവനക്കാരെയും പരിശോധന നടത്തുമെന്ന് ദേവസ്വം ബോര്ഡ് അറിയിച്ചിട്ടുണ്ട്.
