കൊല്ലം: തദ്ദേശ തെരഞ്ഞെടുപ്പില് ബിജെപി ജില്ലയില് എമ്പാടും ഉജ്ജ്വല വിജയം നേടുമെന്ന് ജില്ലാ പ്രസിഡന്റ് ബി.ബി. ഗോപകുമാര്. കൊല്ലം കോര്പ്പറേഷന് ഭരിക്കാനാവശ്യമായ കേവലഭൂരിപക്ഷത്തിലേക്ക് എത്തുമെന്നും അദ്ദേഹം കൊല്ലത്ത് വാര്ത്താസമ്മേളനത്തില് പറഞ്ഞു.
ജില്ലാ പഞ്ചായത്തിലേക്കും ബ്ലോക്ക് പഞ്ചായത്തിലേക്കും നിരവധി സീറ്റുകള് വിജയിച്ച് പാര്ട്ടി നിര്ണായക ശക്തിയാകും. ജില്ലയിലെ നിരവധി ഗ്രാമപഞ്ചായത്തുകള് പാര്ട്ടി ഭരിക്കുമെന്ന് മറ്റുള്ളിടത്ത് ശക്തമായ പ്രതിപക്ഷമാകുമെന്നും അദ്ദേഹം വ്യക്തമാക്കി. കഴിഞ്ഞ ഒരു പതിറ്റാണ്ട് ജില്ലയിലെ തദ്ദേശ സ്ഥാപനങ്ങള് പ്രത്യേകിച്ചും കൊല്ലം കോര്പ്പറേഷന് ഭരിച്ച സിപിഎമ്മിന്റെ നേതൃത്വത്തില് എല്ഡിഎഫ് വമ്പിച്ച അഴിമതിയാണ് നടത്തിയത്. യാതൊരുവിധ വികസനവും കൊല്ലത്ത് ഇവര് നടപ്പാക്കിയിട്ടില്ല. 2010 മുതല് ഭരിച്ച സിപിഎം നേതാക്കള് നടത്തിയ അഴിമതി സി ആന്ഡ് എജിയുടെ റിപ്പോര്ട്ടില് അക്കമിട്ട് ചൂണ്ടിക്കാട്ടിയിട്ടുണ്ട്. ഇവരുടെ അഴിമതിക്കെതിരായ ജനവികാരം ജില്ലയിലെമ്പാടും ശക്തമാണ്. ബദല് ആഗ്രഹിക്കുന്ന ജനത്തിനു മുന്നില് കോണ്ഗ്രസ് നേതൃത്വം നല്കുന്ന യുഡിഎഫ് അതീവദുര്ബലമാകുന്ന കാഴ്ചയാണ് കണ്ടത്.
ഇതില് നിന്നെല്ലാം വ്യത്യസ്തമായ ഭരണം ആഗ്രഹിക്കുന്ന ജനം ഇക്കുറി ബിജെപി നേതൃത്വത്തിലുള്ള എന്ഡിഎക്ക് അവസരം നല്കും. കേന്ദ്രപദ്ധതികള് ഗൗരവം ചോര്ന്നുപോകാതെ നടപ്പാക്കാന് ഭരണം ലഭിച്ചാല് എന്ഡിഎക്ക് കഴിയും. പ്രധാനമന്ത്രി നരേന്ദ്രമോദിയുടെ വികസനനേട്ടങ്ങള് തിരിച്ചറിഞ്ഞ ജില്ലയിലെ പ്രബുദ്ധരായ വോട്ടര്മാര് ബിജെപിയും അധികാരത്തിലേറ്റുമെന്നും അദ്ദേഹം പറഞ്ഞു.
