ചവറ: ഇവിടെ സ്ഥാനാര്‍ഥിക്ക് പേരില്‍ തന്നെയുണ്ട് ചിഹ്നം. ചവറ തെക്കുംഭാഗം താമരാല്‍ വീട്ടില്‍ ശശിയാണ് ഇപ്പോള്‍ നാട്ടിലെ താരം. ബിജെപിക്കായി മത്സരരംഗത്തുള്ള അദ്ദേഹം മൂന്നരപതിറ്റാണ്ടിന്റെ പൊതുപ്രവര്‍ത്തനത്തിന് ഉടമയാണ്. ചവറ ബ്ലോക്ക് പഞ്ചായത്തിലെ കോയിവിള അഞ്ചാം ഡിവിഷനില്‍ സ്ഥാനാര്‍ഥിയാണ് ശശി താമരാല്‍.
ആര്‍എസ്പിയുടെ പ്രവര്‍ത്തകനായിരുന്നു മുമ്പ് ശശി. ശ്രീകണ്ഠന്‍നായരുടെയും ബേബിജോണിന്റെയും തട്ടകത്തില്‍ രാഷ്‌ട്രീയം പഠിച്ചുവളര്‍ന്ന എളിയ പ്രവര്‍ത്തകന്‍. അര്‍ഹതപ്പെട്ട സ്ഥാനങ്ങളെല്ലാം കൈവിട്ടുപോകുമ്പോഴും പാര്‍ട്ടി ധാരാളമായി പിളര്‍ന്നപ്പോഴും ഔദ്യോഗികപക്ഷത്തോട് ഒപ്പം അടിയുറച്ച് നിന്ന് ചവറയിലെ പ്രവര്‍ത്തനങ്ങള്‍ക്കു ചുക്കാന്‍ പിടിച്ചു.
രാജ്യത്തിന്റെ പുരോഗതിക്ക് കാര്യമായ പ്രവര്‍ത്തനം ദേശീയ പാര്‍ട്ടിയായ ബിജെപിയുടെ ഭാഗത്തുനിന്നും ഉണ്ടായത് തിരിച്ചറിഞ്ഞതാണ് അദ്ദേഹത്തെ മറിച്ചു ചിന്തിപ്പിച്ചത്. മോദിയുടെ ഭരണമികവും സുതാര്യമായ രാഷ്‌ട്രീയവുമെല്ലാം മനസിലായതോടെ ദേശീയതയോടൊപ്പം ചേരാന്‍ മൂന്നുവര്‍ഷം മുമ്പ് തീരുമാനിച്ചു.
പാര്‍ട്ടി അര്‍ഹിച്ച പരിഗണനയാണ് സ്ഥാനാര്‍ഥിത്വത്തിലൂടെ തനിക്ക് നല്‍കിയതെന്ന് ശശി പറഞ്ഞു. ചവറ ബ്ലോക്കില്‍ ബിജെപിയുടെ മികച്ച വിജയത്തിനായി പ്രവര്‍ത്തിക്കുകയാണിപ്പോള്‍. ഭാര്യ ഷീജ. ധനുഷ്, ധനീഷ് എന്നിവര്‍ മക്കളാണ്.
പ്രതികരിക്കാൻ ഇവിടെ എഴുതുക: