തൃശൂര്‍: സംസ്ഥാനത്ത് മുഖ്യമന്ത്രിയും പ്രതിപക്ഷ നേതാവും ഉള്‍പ്പെടെയുള്ളവര്‍ വൈകാതെ ജയിലിലേക്ക് പോകുന്ന സാഹചര്യമാണുള്ളതെന്ന് ബിജെപി ദേശീയ നിര്‍വാഹക സമിതിയംഗം പി.കെ. കൃഷ്ണദാസ്. എല്‍ഡിഎഫ്-യുഡിഎഫ് നേതാക്കള്‍ക്കായി പ്രത്യേക ജയില്‍ നിര്‍മ്മിക്കുന്നതാകും നല്ലതെന്നും അദ്ദേഹം പറഞ്ഞു. തൃശൂരില്‍ എന്‍ഡിഎയുടെ വിവിധ പ്രചാരണ പരിപാടികളില്‍ സംസാരിക്കുകയായിരുന്നു അദ്ദേഹം.
സ്വപ്‌ന സുരേഷിന്റെ ശബ്ദരേഖ പുറത്തുവന്നതോടെ സ്വര്‍ണക്കടത്തില്‍ കള്ളന്‍ കപ്പലില്‍ തന്നെയെന്ന് കേരളത്തിലെ ജനങ്ങള്‍ക്ക് മനസിലായി. മുഖ്യമന്ത്രിയെ രക്ഷിക്കാനുള്ള നാടകമാണ് വിജിലന്‍സിലേയും ജയില്‍ വകുപ്പിലേയും ചില ഉദ്യോഗസ്ഥരുടെ സഹായത്തോടെ നടക്കുന്നത്. കൂട്ടുപ്രതികളായ സ്വപ്‌നയും ശിവശങ്കറും മുഖ്യമന്ത്രിയെ രക്ഷിക്കാന്‍ പരമാവധി ശ്രമിക്കുകയാണ്. ഇത്തരം നാടകങ്ങള്‍ ജനം തിരിച്ചറിയും. ഈ തെരഞ്ഞെടുപ്പില്‍ അത് പ്രതിഫലിക്കുമെന്നും കൃഷ്ണദാസ് പറഞ്ഞു. ജില്ലയിലെ പത്തോളം കേന്ദ്രങ്ങളില്‍ ഇന്നലെ പി.കെ. കൃഷ്ണദാസ് എന്‍ഡിഎ പ്രചാരണ പരിപാടികളില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: