തിരുവനന്തപുരം: കേരളത്തില്‍ കൊറോണ വൈറസ് മരണങ്ങള്‍ സംസ്ഥാന സര്‍ക്കാര്‍ ഒളിപ്പിക്കുന്നതായി അന്താരാഷ്‌ട്ര മാധ്യമമായ ബിബിസി. സംസ്ഥാനത്തെ ആരോഗ്യ പ്രവര്‍ത്തകരുടെ കൂട്ടായ്മ പ്രാദേശിക മാധ്യമങ്ങളില്‍ വരുന്ന വാര്‍ത്തകളുടെ അടിസ്ഥാനത്തില്‍ ഡോ. അരുണ്‍ മാധവന്‍ ഉള്‍പ്പടെയുള്ള സംഘം നടത്തിയ പഠനത്തിലാണ് കോവിഡ് മരണങ്ങള്‍ സംസ്ഥാന സര്‍ക്കാര്‍ ഒളിപ്പിക്കുന്നതായി ബിബിസി റിപ്പോര്‍ട്ട് പുറത്തുവിട്ടിരിക്കുന്നത്.
ഇതുപ്രകാരം സംസ്ഥാനത്ത് കൊറോണ വ്യാപകമായത് ജൂലൈയിലാണ്. എന്നാല്‍ ഈ കാലയളവിലെ കോവിഡ് മരണങ്ങളെ പട്ടികയില്‍ നിന്നും ഒഴിവാക്കാന്‍ ശ്രമിക്കുന്നതായാണ് റിപ്പോര്‍ട്ട്. കഴിഞ്ഞ ദിവസം സംസ്ഥാന സര്‍ക്കാര്‍ പുറത്തുവിട്ട കണക്കുകള്‍ പ്രകാരം 1969പേര്‍ മരിച്ചെന്നാണ് പറയുന്നത്. എന്നാല്‍ അനൗദ്യോഗിക കണക്കുകളില്‍ 3356 പേര്‍ കൊറോണ വൈറസ് ബാധിച്ച് മരിച്ചിട്ടുണ്ടെന്നാണ് ഇതില്‍ പറയുന്നത്.
കൊറോണ ബാധിച്ച് മരിച്ച ഗുരുതര രോഗമുള്ളവരെ ഈ പട്ടികയില്‍ നിന്നും ഒഴിവാക്കി കണക്കുകള്‍ കുറച്ചു കാണിക്കുന്ന പ്രവണതയാണ് സംസ്ഥാന സര്‍ക്കാരിന് ഉള്ളതെന്നും ബിബിസി വിമര്‍ശിച്ചു. ലോകത്തിലെ എല്ലാ രാജ്യങ്ങളിലും 30 മുതല്‍ 50 ശതമാനം വരെയാണ് കോവിഡ് മരണങ്ങള്‍ റിപ്പോര്‍ട്ട് ചെയ്തിരിക്കുന്നത്. ഇന്ത്യയിലെ ഓരോ തദ്ദേശ സ്ഥാപനങ്ങളും ആഴ്ചതോറും ഇതുമായി ബന്ധപ്പെട്ട യഥാര്‍ത്ഥ കണക്കുകള്‍ നിര്‍ബന്ധമായും പുറത്തുവിടണമെന്നും റിപ്പോര്‍ട്ടില്‍ പറയുന്നുണ്ട്. മറ്റ് സംസ്ഥാനങ്ങളെ അപേക്ഷിച്ച് കൊറോണ പ്രതിരോധത്തില്‍ കേരളം മികച്ച പ്രവര്‍ത്തനങ്ങളാണ് കാഴ്ചവെയ്‌ക്കുന്നതെന്ന് വരുത്തി തീര്‍ക്കാനുള്ള ശ്രമമാണ് നടക്കുന്നത്.
ലോകാരോഗ്യ സംഘടനയുടെയും ഐസിഎംആറിന്റെയും മാര്‍ഗനിര്‍ദ്ദേശങ്ങള്‍ ചൂണ്ടിക്കാണിച്ചുകൊണ്ടാണ് സംസ്ഥാനം ഇത്തരത്തില്‍ കൊറോണ മരണങ്ങള്‍ കുറച്ചുകാണിക്കുന്നത്. ജൂലൈയില്‍ മാത്രം 22 മരണം പട്ടികയ്‌ക്ക് പുറത്തായിരുന്നു. അതേസമയം ചില മരണം ചേര്‍ക്കുന്നതില്‍ പിഴവ് പറ്റിയിട്ടുണ്ടെന്ന് അധികൃതരും സമ്മതിച്ചിട്ടുണ്ട്.
‘വിവരങ്ങള്‍ കൈകാര്യം ചെയ്യുന്നതില്‍ ഏറ്റവുമധികം സുതാര്യതയുണ്ടെന്ന് അവകാശപ്പെടുന്ന കേരളത്തിലാണ് ഇത് സംഭവിക്കുന്നത്. മരണത്തിന് തൊട്ടുമുന്‍പ് കൊറോണ നെഗറ്റീവ് ആയവരെ പോലും രോഗം ബാധിച്ച് മരിച്ചവരുടെ പട്ടികയില്‍ ഉള്‍പ്പെടുത്തുന്നില്ല. ഒക്ടോബറില്‍ കൊറോണ ചികിത്സ തേടി എന്നെ സമീപിച്ച മൂന്ന് പേര്‍ മരിച്ചു. എന്നാല്‍ അവരുടെ മരണം സര്‍ക്കാരിന്റെ പട്ടികയില്‍ കണ്ടില്ലെന്നും ഡോ. അരുണ്‍ മാധവന്‍ അറിയിച്ചു.
ഈ വര്‍ഷം ജനുവരിയിലാണ് കേരളത്തില്‍ ആദ്യമായി കൊറോണ റിപ്പോര്‍ട്ട് ചെയ്തത്. വുഹാനില്‍ നിന്നെത്തിയ വിദ്യാര്‍ത്ഥിക്കാണ് ആദ്യം രോഗം സ്ഥിരീകരിച്ചത്. ഇവരെ ചികിത്സച്ച് ഭേദമാക്കാന്‍ ആയെങ്കിലും പിന്നീട് മാര്‍ച്ചോടെ കൂടുതല്‍ കേസുകള്‍ റിപ്പോര്‍ട്ട് ചെയ്യുകയായിരുന്നു. എന്നാല്‍ മറ്റ സംസ്ഥാനങ്ങളെ അപേക്ഷിച്ച് കേരളത്തില്‍ രോഗ വ്യാപനം കുറഞ്ഞ തോതില്‍ ആയിരുന്നെന്നും ബിബിസി പറയുന്നുണ്ട്. ആദ്യത്തെ കോവിഡ് കേസ് റിപ്പോര്‍ട്ട് ചെയ്തതിന് 110 ദിവസങ്ങള്‍ക്ക് ശേഷമാണ് കേരളത്തില്‍ കൊറോണ വൈറസ് രോഗബാധിതരുടെ എണ്ണം 1000ല്‍ എത്തിയത്.
ഈമാസം 19ന് പുറത്തുവന്ന കണക്കുകള്‍ പ്രകാരം 545641 പേര്‍ക്കാണ് കൊറോണ രോഗം റിപ്പോര്‍ട്ട് ചെയ്തിട്ടുള്ളത്. 46000ല്‍ അധികം ആളുകള്‍ ആശുപത്രികളിലും വീടുകളില്‍ നിരീക്ഷണത്തിലുമാണ്. പ്രതിദിനം ശരാശരി 60,000 ആളുകളാണ് ഇവിടെ കൊറോണ പരിശോധനയ്‌ക്ക് വിധേയരാകുന്നതെന്നും ഇതില്‍ പറയുന്നുണ്ട്.
പ്രതികരിക്കാൻ ഇവിടെ എഴുതുക: