തിരുവനന്തപുരം:കിഫ്ബിക്കെതിരെ ബിജെപിക്കാര്‍ നല്‍കിയ കേസില്‍ വാദിക്കുന്നത് കോണ്‍ഗ്രസ് നേതാവായ മാത്യു കുഴല്‍നാടന്‍ ആയത് ബിജെപിയും കോണ്‍ഗ്രസും തമ്മിലുള്ള ഒത്തുകളി വെളിവാക്കുന്നുവെന്ന് ധനമന്ത്രി തോമസ് ഐസക്. ശരി, അങ്ങനെയെങ്കില്‍ ഐസക് ഒരു കാര്യം കൂടി സമ്മതിക്കണമെന്ന് ശ്രീജിത്ത് പണിക്കര്‍
ലാവലിന്‍ കേസില്‍ പിണറായി വിജയന് വേണ്ടി വാദിച്ച എം കെ ദാമോദരന്‍ തന്നെയാണ് ബാര്‍ കോഴ കേസില്‍ കെ എം മാണിക്ക് വേണ്ടി വാദിച്ചത്. ഇതേ ദാമോദരന്‍ തന്നെയാണ് ലോട്ടറി തട്ടിപ്പ് കേസില്‍ സാന്റിയാഗോ മാര്‍ട്ടിനു വേണ്ടിയും, പാറമട കേസില്‍ ക്വാറി മുതലാളിമാര്‍ക്ക് വേണ്ടിയും വാദിച്ചത്. ഇതേ ദാമോദരനെയാണ് മുഖ്യമന്ത്രി പിണറായി വിജയന്റെ നിയമോപദേഷ്ടാവായി ആദ്യം നിയമിച്ചത്.
അപ്പോള്‍ ഇതൊക്കെ മാണിയും ലോട്ടറി മാഫിയയും പാറമടക്കാരുമായി സിപിഎമ്മിനുള്ള ഒത്തുകളിയുടെ തെളിവായി പരിഗണിക്കാമോ ധനമന്ത്രീ ? എന്റെയല്ല, താങ്കളുടെ തന്നെ യുക്തിയാണ് ഞാന്‍ ഉപയോഗിച്ചത്.
അഭിഭാഷകവൃത്തി എന്നത് ഒരു തൊഴിലാണ്. അതില്‍ രാഷ്‌ട്രീയം കാണരുത്. കുഴല്‍നാടന്‍ അദ്ദേഹത്തിന്റെ ജോലി ചെയ്യട്ടെ. അദ്ദേഹത്തെ ബിജെപിക്കാര്‍ക്ക് വിശ്വാസം ആണെങ്കില്‍ ധനമന്ത്രി ബേജാര്‍ ആകുന്നത് എന്തിന് ? ആണുങ്ങളെ പോലെ കേസ് നേരിടണം.
കോടതി കൈരളി സ്റ്റുഡിയോ അല്ലാത്തതിനാല്‍ ഇടയ്‌ക്കുവച്ച് ഇറങ്ങിപ്പോകാന്‍ കഴിയില്ല. പഴയ ചര്‍ച്ച ഓര്‍ത്തെന്നേയുള്ളൂ. ശ്രീജിത്ത് ഫേസ് ബുക്കില്‍കുറിച്ചു
പ്രതികരിക്കാൻ ഇവിടെ എഴുതുക: