തൊടുപുഴ: ബ്ലോക്ക്/ നഗരസഭ രാഷ്ട്രീയ പാര്ട്ടി പ്രതിനിധികളുടെയും വരണാധികാരികളുടെയും യോഗം ചേര്ന്നു. കട്ടപ്പന നഗരസഭയില് വരണാധികാരി മൂന്നാര് എല്എ ഡെപ്യൂട്ടി കളക്ടര് അലക്സ് മാത്യുവിന്റെ അദ്ധ്യക്ഷതയില് നഗരസഭാ കാര്യാലയത്തില് യോഗം ചേര്ന്നു. തൊടുപുഴ നഗരസഭയില് ആര്ഡിഒ അതുല് എസ്. നാഥും, അടിമാലി ബ്ലോക്കില് കോ-ഓപ്പറേറ്റീവ് സൊസൈറ്റീസ് ജോയിന്റ് രജിസ്ട്രാര്(ജനറല്) എച്ച്. അന്സാരിയും, ദേവികുളത്ത് സബ് കളക്ടര് എസ്. പ്രേം കൃഷ്ണന്, നെടുങ്കണ്ടത്ത് സര്വ്വെ ഡെപ്യൂട്ടി ഡയറക്ടര് എ.എ. രാജന്, ഇളംദേശത്ത് എഡിസി(ജനറല്) ശ്രീലേഖ സി, ഇടുക്കിയില് ആര്ആര് ഡെപ്യൂട്ടി കളക്ടര് ജോളി ജോസഫ്, കട്ടപ്പനയില് എല്എ & എല്ആര് ഡെപ്യൂട്ടി കളക്ടര് എസ.് ബിന്ദു, തൊടുപുഴയില് ജില്ലാ ലേബര് ഓഫീസര് വി.കെ. നവാസ്, അഴുത ബ്ലോക്കില് അസിസ്റ്റന്റ് കാര്ഡമം സെറ്റില്മെന്റ് ഓഫീസര് എലിസബത്ത് മാത്യു എന്നീ വരണാധികാരികളുടെ അദ്ധ്യക്ഷതയിലായിരുന്നു യോഗം. കൊറോണ മാനദണ്ഡങ്ങള് പാലിച്ച് തെരഞ്ഞെടുപ്പ് പ്രക്രിയ പൂര്ത്തിയാക്കാന് യോഗം തീരുമാനിച്ചു.
തെരഞ്ഞെടുപ്പ് പ്രചാരണവുമായി ബന്ധപ്പെട്ട് വീടുകളില് അഞ്ചില് കൂടുതല് ആളുകള് പോകരുത്. മതസ്പര്ദ്ധ, വ്യക്തിഹത്യ, ജീവിത സ്വാതന്ത്ര്യത്തിന് ഭംഗംവരുത്തുക തുടങ്ങിയ വിധത്തില് പ്രചാരണങ്ങള് നടത്തരുത്. സര്ക്കാര് വസ്തുക്കള് പ്രചാരണത്തിനായി ഉപയോഗിക്കരുത്.
ഇന്ന് പഞ്ചായത്തു തലത്തില് വരണാധികാരി ഉപവരണാധികാരി എന്നിവരുടെ നേതൃത്വത്തില് രാഷ്ട്രീയ പാര്ട്ടി പ്രതിനിധികളുടെ യോഗം ചേരും. ഇന്ന് തെരഞ്ഞെടുപ്പ് വിജ്ഞാപനം വന്നാല് ഓരോ വാര്ഡിലും വരാണാധികാരിയുടേയും ഉപവരണാധികാരിയുടേയും ഓഫീസിലും തെരഞ്ഞെടുപ്പ് നോട്ടീസ് പ്രസിദ്ധീകരിക്കും. നോട്ടീസ് പ്രസിദ്ധീകരിച്ചാല് രാവിലെ 11 മുതല് 3 വരെ നോമിനേഷന് സ്വീകരിക്കുവാന് ആരംഭിക്കും. നോമിനേഷന് സ്വീകരിക്കുമ്പോള് തന്നെ ചെക്ക് ലിസ്റ്റ് വച്ച് പരിശോധിച്ച് നോമിനേഷനിലെ ന്യൂനതകള് പരിഹരിക്കുമെന്നും യോഗത്തില് വിശദീകരിച്ചു. ബ്ലോക്ക് പഞ്ചായത്തുകള്ക്ക് കീഴിലുള്ള ഗ്രാമ പഞ്ചായത്തുകള് ഫോറങ്ങള് ഉടന് കൈപ്പറ്റണമെന്നും യോഗം അറിയിച്ചു.
സ്ഥാനാര്ത്ഥികളുടെ പ്രചാരണ പ്രവര്ത്തനങ്ങള്
– ഭവന സന്ദര്ശനത്തിന് ഒരു സമയം സ്ഥാനാര്ത്ഥികള് ഉള്പ്പെടെ പരമാവധി അഞ്ചുപേര് മാത്രം.
– റോഡ് ഷോ/ വാഹനറാലി എന്നിവയ്ക്ക് പരമാവധി മൂന്ന് വാഹനങ്ങള്.
– ജാഥ, ആള്ക്കൂട്ടം, കൊട്ടിക്കലാശം എന്നിവ പശ്ചാത്തലത്തില് ഒഴിവാക്കേണ്ടതാണ്.
– പൊതുയോഗങ്ങള്, കുടുംബയോഗങ്ങള് എന്നിവ കൊറോണ നിയന്ത്രണങ്ങള് പാലിച്ച് മാത്രമേ നടത്താന് പാടുള്ളൂ.
– പൊതുയോഗങ്ങള് നടത്തുന്നതിന് പോലീസിന്റെ മുന്കൂര് അനുമതി വാങ്ങണം.
– നോട്ടീസ്/ ലഘുലേഖ എന്നിവ പരിമിതപ്പെടുത്തി പരമാവധി സോഷ്യല് മീഡിയ പ്രയോജനപ്പെടുത്തണം.
– മാസ്ക്, സാനിറ്റൈസര് എന്നിവ വോട്ടര്മാര് ഉപയോഗിക്കണമെന്ന സന്ദേശം പ്രചാരണ പ്രവര്ത്തനങ്ങളില് ഉള്പ്പെടുത്തേണ്ടതാണ്.
– സ്ഥാനാര്ത്ഥികള്ക്ക് ഹാരം, ബൊക്ക, നോട്ടുമാല, ഷാള് എന്നിവയോ മറ്റോ നല്കിക്കൊണ്ടുള്ള സ്വീകരണ പരിപാടി പാടില്ല.
– ഏതെങ്കിലും സ്ഥാനാര്ത്ഥിക്ക് കൊറോണ പോസിറ്റീവ് ആകുകയോ ആരോഗ്യ വകുപ്പ് നിര്ദ്ദേശിക്കുന്ന ക്വാറന്റൈനില് പ്രവേശിക്കുകയോ ചെയ്യുന്ന പക്ഷം ഉടന് തന്നെ പ്രചാരണ രംഗത്ത് നിന്നും മാറി നില്ക്കണം. ടെസ്റ്റ് റിസള്ട്ട് നെഗറ്റീവ് ആയതിനുശേഷവും ആരോഗ്യ വകുപ്പിന്റെ നിര്ദേശാനുസരണം മാത്രമേ തുടര്പ്രവര്ത്തനം പാടുള്ളൂ.
