ലോകം മുഴുവന്‍ സ്ത്രീകളും കുട്ടികളും നിരന്തരം ലൈംഗിക പീഡനത്തിന് ഇരയായി കൊണ്ടിരിക്കുന്നു.ഇതിനെതിരെ ശക്തമായ സന്ദേശവുമായി ഒരു ചിത്രം വരുന്നു. ത്രു ഹെര്‍ ഐസ് എന്ന ഈ ചിത്രം നൂര്‍ എന്റര്‍ടൈമെന്റിന്റെ ബാനറില്‍ ലിഖിത നോര്‍മന്‍ നിര്‍മ്മിക്കുന്നു. അരുണ്‍ ഉണ്ണികൃഷ്ണന്‍ സംവിധാനം ചെയ്യുന്ന ഈ ചിത്രം അന്താരാഷ്‌ട്ര ബാലിക ദിനമായ ഒക്ടോബര്‍ 11-ന് ടീം ജാങ്കോസ്‌പേസ് ചാനലില്‍ റിലീസ് ചെയ്തു. ആണധികാരത്തിന്റെ, ലൈംഗികചോദനകള്‍ക്ക് സ്ത്രീകളും ബാലികമാരും അടിമപ്പെട്ടുകൊണ്ടിരിക്കുന്ന ഈ കാലഘട്ടത്തില്‍ ഈ ചിത്രത്തിന് പ്രാധാന്യം വര്‍ദ്ധിക്കുന്നു. രചന നാരായണന്‍കുട്ടി, നിരവധി തമിഴ്-മലയാളം ചിത്രങ്ങളില്‍ നായകനായി വേഷമിട്ട ആദി അനിചന്‍ എന്നിവര്‍ പ്രധാന വേഷത്തിലെത്തുന്ന ചിത്രമാണിത്.
അമ്മമാരാണ് പെണ്‍കുട്ടികളുടെ സുരക്ഷിതത്വത്തെക്കുറിച്ച് ഏറ്റവും വേവലാതിപ്പെടുന്നത്. ചിത്രത്തിലെ നായികയായ അമ്മയായ രചന നാരായണന്‍കുട്ടിക്ക് ഒരു പെണ്‍കുട്ടിയുണ്ട്. ഭര്‍ത്താവ് ബാംഗ്ലൂരില്‍ ജോലി ചെയ്യുന്നു. പലപ്പോഴും ഭാര്യയ്‌ക്ക് നൈറ്റ് ഡ്യൂട്ടി ചെയ്യേണ്ടി വരുന്നു. അപ്പോള്‍, വയ്യാത്ത വല്യമ്മച്ചിയുടെ അടുത്ത് റീത്തു മോളെ ഏല്‍പ്പിച്ചിട്ടാണ് അവര്‍ ജോലിക്ക് പോകുന്നത്. വല്യമ്മച്ചിക്കാണെങ്കില്‍ മോളെ ശരിക്കും ശ്രദ്ധിക്കാനും കഴിയുന്നില്ല. അതിന്റെ മാനസിക ബുദ്ധിമുട്ട് കുട്ടിയുടെ അമ്മയ്‌ക്കും ഉണ്ട്. മാനസിക പിരിമുറുക്കത്തോടെയാണ് അവര്‍ ഡ്യൂട്ടിക്ക് പോകുന്നത്.ചുറ്റുപാടും നടക്കുന്ന ബാലിക പീഡനത്തെക്കുറിച്ച് കേള്‍ക്കുമ്പോള്‍ അവരുടെ നെഞ്ചിടിപ്പ് വര്‍ദ്ധിക്കും!ശക്തമായ ആവിഷ്‌കരണവുമായി എത്തിയ ത്രു ഹെര്‍ ഐസ് എന്ന ചിത്രം മികച്ച പ്രതികരണം നേടിക്കഴിഞ്ഞു.
രചന-അനുചന്ദ്ര, ക്യാമറ – അന്‍സൂര്‍ പി.എം, എഡിറ്റര്‍-ആദിത്യ സന്‍ജു മാധവ്, അസോസിയേറ്റ് ഡയറക്ടര്‍ -സബിന്‍ കാട്ടുങ്ങല്‍, മേക്കപ്പ് – അമല്‍ അജിത് കുമാര്‍, മണി, കല – ദീപമോഹനന്‍, പ്രൊഡക്ഷന്‍ കണ്‍ട്രോളര്‍- ഗിരീഷ് കരുവന്തല, മാനേജര്‍-സതീഷ്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: