ഐ സ്വാള്(മിസോറാം): ക്രിയാശക്തിയും ജ്ഞാന ശക്തിയും ഇച്ഛാശക്തിയും സംഗമിച്ച സ്ഥിതപ്രജ്ഞനായ കര്മ്മയോഗിയെയാണ് മാര്ത്തോമാ സഭാ അധ്യക്ഷന് ഡോ.ജോസഫ് മെത്രാപ്പൊലീത്തയുടെ വേര്പാടോടെ നഷ്ടമായതെന്ന് മിസോറാം ഗവര്ണര് പി.എസ്. ശ്രീധരന് പിള്ള.
സാമൂഹ്യ സേവനവും ആത്മീയതയിലൂന്നിയ മനുഷ്യ നിര്മ്മിതിയും ജീവിത വൃതമാക്കിയ അദ്ദേഹം കഠിനാദ്ധ്വാനവും നിരന്തര യാത്രയും നടത്തി മാര്ത്തോമ സഭയെ ലോകമെമ്പാടും വ്യാപിപ്പിക്കാന് ശമിച്ച വ്യക്തിത്വത്തിന്നുടമയാണ്. എഴുത്തിന്റെ വീഥിയില് തനിക്ക് എന്നും അദ്ദേഹം പ്രോത്സാഹനം നല്കിയിരുന്നുവെന്നും ശ്രീധരന് പിള്ള പറഞ്ഞു.
2016 ല് ചെങ്ങന്നൂരില് നിയമസഭാ തിരഞ്ഞെടുപ്പില് സ്ഥാനാര്ത്ഥിയായിരിക്കെ തന്റെ പുസ്തകം പ്രകാശനം ചെയ്യാന് അദ്ദേഹം തയ്യാറായതു സ്മരിക്കുന്നതായി ശ്രീധരന് പിള്ള പറഞ്ഞു. ഇന്ത്യന് ജനതയുടെ സപ്ത സ്വാതന്ത്ര്യങ്ങളും നിഷേധിക്കപ്പെട്ടപ്പോള് അടിയന്തരാവസ്ഥക്കെതിരെ ശബ്ദമുയര്ത്തുകയും അടിയന്തരാവസ്ഥ പിന്വലിക്കണമെന്നു ധീരമായി ആവശ്യപ്പെടുകയും ചെയ്ത മത നേതാക്കളില് പ്രഥമ ഗണനീയനാണ് ഡോ.ജോസഫ് മാര് മെത്രാപ്പൊലീത്ത.
നരേന്ദ്ര മോദി രണ്ടാം തവണ പ്രധാനമന്ത്രി പദം ഏറ്റെടുത്ത സത്യപ്രതിജ്ഞാച്ചടങ്ങില് ശ്രീധരന് പിള്ളക്കൊപ്പം അദ്ദേഹം ദല്ഹിയിലേക്ക് യത്രചെയ്തതും സ്മരിച്ചു. ജീവിതത്തിലുടനീളം തളര്ച്ചയറിയാത്ത ഒരു പോരാളിയായിരുന്നു മെത്രാപ്പൊലീത്തയെന്ന് അദ്ദേഹം അനുശോചിച്ചു. കൊറോണ ശമിച്ച ശേഷം മിസോറാമില് വരാമെന്നും രാജ്ഭവനില് അതിഥിയായി താമസിക്കണമെന്നും അദ്ദേഹം ആഗ്രഹം പ്രകടിപ്പിച്ചിരുന്നത് നടപ്പാക്കാനാവാതെ പോയതില് എനിക്ക് വേദനയുണ്ടെന്നും പി.എസ് ശ്രീധരന് പിള്ള ുറഞ്ഞു.
