തൃശൂര്‍ : വടക്കാഞ്ചേരി ലൈഫ് മിഷന്‍ ഫ്‌ളാറ്റിന്റെ ബല പരിശോധന നടത്തിയേക്കും. ഇതിനായി അന്വേഷണ ഏജന്‍സികള്‍ നടപടികള്‍ ആരംഭിച്ചു. ലൈഫ് മിഷന്‍ പദ്ധതിക്കായുള്ള കരാര്‍ നല്‍കിയതില്‍ തട്ടിപ്പും അഴിമതിയും നടന്നതായി പുറത്തുവന്നതിന്റെ അടിസ്ഥാനത്തിലാണ് ഈ നടപടി. ഫ്‌ളാറ്റുകളുടെ ബലം പരിശോധിക്കുന്നതിനായി പൊതുമരാമത്ത് വകുപ്പിന് വിജിലന്‍സ് കത്ത് നല്‍കും. ഇതോടൊപ്പം സിബിഐയും ബലപരിശോധന നടത്തും.
യുണിടാക്കിന് നല്‍കിയ കരാര്‍ തുകയുടെ 40 ശതമാനവും കമ്മീഷനായി സ്വപ്ന ഉള്‍പ്പടെയുള്ളവര്‍ക്ക് നല്‍കിയിരുന്നു. ബാക്കി തുകയ്‌ക്കാണ് ഫ്‌ളാറ്റുകള്‍ നിര്‍മിക്കുന്നത്. പദ്ധതിക്കായി നാലരക്കോടിയാണ് കൈക്കൂലിയായി യുണിടാക്ക് നല്‍കിയത്. മൂന്ന് കോടിയും ജിഎസ്ടിയും കഴിഞ്ഞ് ബാക്കി തുകയ്‌ക്കാണ് ലൈഫ് മിഷന്‍ ഫ്‌ളാറ്റുകളുടെ നിര്‍മാണം.
സന്ദീപ് നായര്‍, സരിത്ത്, സന്തോഷ് ഈപ്പന്‍ എന്നിവരുടെ ബാങ്ക് അക്കൗണ്ടുകള്‍ പരിശോധിച്ചതില്‍ ലൈഫ് മിഷന്‍ കേസിലെ കമ്മിഷന്‍ ഇടപാടുകളുമായി ബന്ധപ്പെട്ട രേഖകള്‍ അന്വേഷണ ഏജന്‍സികള്‍ക്ക് ലഭിച്ചിട്ടുണ്ട്. യൂണിടാക് ഡയറക്ടര്‍ സന്തോഷ് ഈപ്പനെ ചോദ്യം ചെയ്തതിലൂടെ കമ്മിഷന്‍ ഇടപാടിന്റെ സ്ഥിരീകരണവും ലഭിച്ചു. എന്നാല്‍ സ്വപ്നുടെ ബാങ്ക് അക്കൗണ്ട് വിശദാംശങ്ങള്‍ ലഭിച്ചിട്ടില്ല.
സ്വപ്നയെയും സന്ദീപിനെയും ചോദ്യം ചെയ്യുന്നതിനായി വിജിലന്‍സ് ഉടന്‍ കൊച്ചി എന്‍ഐഎ കോടതിയെ സമീപിക്കാനുള്ള ഒരുക്കത്തിലാണ്. കരാറുണ്ടാക്കിയതിന്റെ തൊട്ടടുത്ത ദിവസം യുഎഇ കോണ്‍സുലേറ്റിന്റെ ബാങ്ക് അക്കൗണ്ടില്‍ നിന്ന് യൂണിടാക്കിന്റെ അക്കൗണ്ടിലേക്ക് 7.5 കോടി രൂപ കൈമാറിയതിന്റെ രേഖകള്‍ ലഭിച്ചു. തുടര്‍ന്ന് യൂണിടാക്കിന്റെ അക്കൗണ്ടില്‍ നിന്ന് സന്ദീപ് നായരുടെ രണ്ട് ബാങ്ക് അക്കൗണ്ടുകളിലേക്ക് 4.20 കോടി രൂപ നല്‍കി. ഇതില്‍ നിന്ന് 3.60 കോടി രൂപ പിന്‍വലിച്ചതിന്റെ രേഖകളും ലഭിച്ചു. ഈ തുക ഡോളാറായും രൂപയായും കോണ്‍സുലേറ്റ് ജീവനക്കാരനും ഈജിപ്ത് സ്വദേശിയുമായ ഖാലിദിന് കൈമാറിയതായി സ്വപ്ന അറിയിച്ചിരുന്നെന്ന് സന്തോഷ് ഈപ്പന്‍ വിജിലന്‍സിന് നല്‍കിയ മൊഴിയില്‍ പറയുന്നുണ്ട്.
പ്രതികരിക്കാൻ ഇവിടെ എഴുതുക: