തിരുവനന്തപുരം; കേന്ദ്ര പദ്ധതിയെ സ്വന്തം പദ്ധതിയായി അവതരിപ്പിച്ച് അല്പത്തം കാണിക്കുന്നതില് കേരളത്തിന് ഒരു അഭിമാനക്കുറവും ഇല്ല. ഒടുവിലത്തേതാണ് ജലജീവന് മിഷന് പദ്ധതി. സംസ്ഥാനത്തെ 49.65 ലക്ഷം ഗ്രാമീണ ഭവനങ്ങളില് 2024 ഓടെ കുടിവെള്ള കണക്ഷന് നല്കാനായി നടപ്പിലാക്കുന്ന പദ്ധതി എന്നവകാശപ്പെട്ട് കൊട്ടഘോഷിച്ച് ഇന്ന് ഉദ്ഘാടനം നിര്വഹിച്ചു. എല്ലാവര്ക്കും കുടിവെള്ളം എന്ന ലക്ഷ്യം വെച്ച് പ്രധാനമന്ത്രി നരേന്ദ്രമോദി ആവിഷ്ക്കരിച്ച പദ്ധതിയാണിത്.
716 പഞ്ചായത്തുകളില് 4343 കോടിയുടെ പദ്ധതികള്ക്കാണ് ജലജീവന് മിഷനിലൂടെ ഭരണാനുമതി നല്കിയിട്ടുള്ളത്. 564 പദ്ധതികളാണ് ആദ്യഘട്ടത്തില് നടപ്പാക്കുന്നത്. നിലവിലുള്ള ശുദ്ധജല പദ്ധതിയുടെ ശേഷി വര്ധിപ്പിച്ചും, ചില പദ്ധതികള് ദീര്ഘിപ്പിച്ചും, ചിലതിന്റെ സ്രോതസ് ശക്തിപ്പെടുത്തിയുമാണ് ഗാര്ഹിക കണക്ഷനുകള് നല്കുന്നത്.
പദ്ധതി നടത്തിപ്പിനായി 1218 കോടി രൂപ അനുവദിച്ചു കഴിഞ്ഞു. ധനകാര്യ കമ്മീഷന്റെ ഗ്രാന്റായി അനുവദിച്ച 1,628 കോടി രൂപ അനുവദിച്ചിട്ടുണ്ട്. ഇതില് 50 ശതമാനം തുകയായ 814 കോടി കുടിവെള്ള പദ്ധതിക്ക് വേണ്ടിയാണ് നല്കിയത്.
67 ലക്ഷം ഗ്രാമീണ ഭവനങ്ങളാണ് കേരളത്തിലുള്ളത്. ഇതില് 10 ലക്ഷം വീടുകളില് കുടിവെള്ളം എത്തിക്കാനാണ് കേന്ദ്രം പണം നല്കിയത്.കേരളം ചെലവഴിച്ചത് വെറും 62 കോടിമാത്രം. വെള്ളം എത്തിച്ചിത് 85,000 വീടുകളില് മാത്രവും.
കേന്ദ്ര പദ്ധതിയെന്ന് ചെറു സൂചന പോലും നല്കാതെയാണ് മുഖ്യമന്ത്രി പിണറായി വിജയന് ഉദ്ഘാടനം നിര്വഹിച്ചത്.
16.48 ലക്ഷം കുടിവെള്ള കണക്ഷനുകള് നല്കാനുള്ള നടപടി ഉടന് ആരംഭിക്കുമെന്ന് മുഖ്യമന്ത്രി പറഞ്ഞു.
പദ്ധതിയുടെ രണ്ടാംഘട്ടം 586 വില്ലേജുകളില് 380 പഞ്ചായത്തുകളിലും, 23 ബ്ളോക്ക് പഞ്ചായത്തുകളിലും മുഴുവന് വീടുകളിലും കണക്ഷന് നല്കാനാണ് ഉദ്ദേശിക്കുന്നതെന്നാണ് പ്രഖ്യാപനം. ഒന്നാം ഘട്ടം 5 ശതമാനം പോലും നടപ്പാക്കാതെയാണ് രണ്ടാം ഘട്ടത്തെക്കുറിച്ചുള്ള അവകാശവാദം
