തിരുവനന്തപുരം: ബിനീഷ് കോടിയേരിയുടെ സ്ഥാപനത്തില് മയക്കുമരുന്ന് കേസിലെ പ്രതി അനൂപ് മുഹമ്മദിനുള്ള പങ്ക് വ്യക്തമാക്കണമെന്ന് യൂത്ത്ലീഗ്. ബിനീഷ് ബെംഗളൂരുവില് ആരംഭിച്ച പണമിടപാട് സ്ഥാപനത്തില് അനൂപിനും പങ്കുണ്ടെന്നും അത് എന്താണെന്ന് വ്യക്തമാക്കണമെന്നും യൂത്ത് ലീഗ് നേതാവ് പി.കെ. ഫിറോസ് ആവശ്യപ്പെട്ടു.
2015ലാണ് ബി ക്യാപിറ്റല് ഫിനാന്സ് സര്വീസ് എന്ന പേരില് ബിനീഷ് പണമിടപാട് സ്ഥാപനം ആരംഭിക്കുന്നത്. അതില് ആര്ക്കൊക്കെയാണ് പണം നല്കിയിട്ടുള്ളതെന്നും വ്യക്തമാക്കണം. അങ്ങിനെ ഒരു സ്ഥാപനം തുടങ്ങിയിട്ടില്ലേ എന്നും ബിനീഷ് മറുപടി നല്കണം.
അനൂപ് മുഹമ്മദുമായുള്ള ബന്ധം എന്താണ്. ബെംഗളൂരുവിലെ സ്ഥാപനത്തില് നിന്നാണോ അനൂപിന് പണം നല്കിയത് എന്ന് വ്യക്തമാക്കണം. പണം നല്കി എന്ന് പറയുന്നത് കള്ളമാണ്. ഇതുമായി ബന്ധപ്പെട്ട കൃത്യമായ തെളിവുകള് തന്റെ പക്കല് ഉണ്ടെന്നും ഫിറോസ് അറിയിച്ചു.
ബെംഗളൂരുവില് പിടിയിലായ ലഹരി സംഘവുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന് ബിനീഷ് കോടിയേരിക്ക് ബന്ധമുണ്ടെന്ന് ഫിറോസ് നേരത്തെ ആരോപിച്ചിരുന്നു. പ്രതിയായ അനൂപ് മുഹമ്മദിന് വേണ്ടി പണം മുടക്കുന്നത് ബിനീഷാണ്. അനൂപ് മുഹമ്മദ് നര്കോട്ടിക് ബ്യൂറോയ്ക്ക് നല്കിയ മൊഴിയും പുറത്തുവിട്ടു.
അനൂപ് മുഹമ്മദിന് ബിനീഷുമായി അടുത്ത ബന്ധമാണുള്ളത്. അനൂപ് മുഹമ്മദ് കുമരകത്ത് ലഹരി നിശാ പാര്ട്ടി നടത്തിയെന്നും ഇക്കാര്യത്തില് ഇക്കാര്യത്തില് സമഗ്രമായ അന്വേഷണം വേണമെന്നും ഫിറോസ് ആവശ്യപ്പെട്ടിരുന്നു. അനൂപിന്റെ ഫോണ്കോള് ലിസ്റ്റില് ബിനീഷ് കോടിയേരി ഉള്പ്പടെയുള്ളവര് ഉള്ളതായി നാര്ക്കോട്ടിക് കണ്ട്രോള് ബ്യൂറോ അറിയിച്ചതിന് പിന്നാലെയാണ് ഫിറോസ് വെളിപ്പെടുത്തലുകള് നടത്തിയത്.
