ന്യൂദല്ഹി: കോവിഡിന്റെ തുടക്കത്തില് കേരള മോഡല് എന്ന് ഏറെ പ്രകീര്ത്തിച്ചവരെ പോലും അമ്പരിപ്പിച്ച് സംസ്ഥാനത്ത് രോഗവ്യാപനം കൈവിട്ട അവസ്ഥയിലേക്ക്. രാജ്യത്തെ മറ്റു സംസ്ഥാനങ്ങളെല്ലാം കാര്യമായ പ്രതിരോധനടപടിയിലൂടെ രോഗത്തെ പിടിച്ചുനിര്ത്തുമ്പോള് കേരളത്തിന്റെ സ്ഥിതി നേര്വിപരീതമെന്ന് പഠനം. സംസ്ഥാനത്തെ കോവിഡ് രോഗം വ്യാപനത്തിന്റെ നിലവിലെ അവസ്ഥ ആശങ്കാജനകമെന്ന് കേന്ദ്രസര്ക്കാരിന്റെ പഠനം. പ്രതിദിന കേസുകളിലെ വര്ധന നിരക്കില് കേരളം രാജ്യത്തു തന്നെ ഒന്നാം സ്ഥാനത്താണെന്നും പോസിറ്റീവ് ആകുന്നവരുടെ നിരക്കില് സംസ്ഥാനം രണ്ടാം സ്ഥാനത്താണെന്നും പഠനം പറയുന്നു. അണ്ലോക്ക്-4 നടപ്പാക്കുന്നതിന്റെ ഭാഗമായി നടത്തിയ പഠനത്തിലാണ് ഇക്കാര്യം വ്യക്തമാക്കിയിട്ടുള്ളത്.
ടെസ്റ്റിങ്ങില് കേരളം വളരെ പിറകിലാണെന്നും പഠനം പറയുന്നു. -6.23 ശതമാനമാണ് കേരളത്തിലെ പരിശോധനാനിരക്ക്. പരിശോധനാ നിരക്കില് കേരളമാണ് ഏറ്റവും പിന്നില്. കോവിഡ് വ്യാപനത്തില് ആശങ്കാജനകമായ സ്ഥിതി നിലനില്ക്കുന്ന സംസ്ഥാനങ്ങളുമായി കേന്ദ്ര ആരോഗ്യ മന്ത്രാലയം കൂടിയാലോചന നടത്താനും തുടര്ന്ന് നടത്തേണ്ട പ്രവര്ത്തനങ്ങളെ കുറിച്ച് ചര്ച്ച ചെയ്യാനും തീരുമാനിച്ചിട്ടുണ്ട്.
രാജ്യത്ത് അണ്ലോക്ക്-4 നടപ്പാക്കുന്നതിന്റെ ഭാഗമായാണ് ഓഗസ്റ്റ് 13 മുതല് 19 വരെ കേന്ദ്ര ആരോഗ്യ മന്ത്രാലയം ഒരു പഠനം നടത്തിയത്. ഈ പഠനത്തിലാണ് കേരളം ഉള്പ്പെടെ 15 സംസ്ഥാനങ്ങളില് കോവിഡ് വ്യാപനത്തില് ആശങ്കാജനകമായ സ്ഥിതി നിലനില്ക്കുന്നതായി കണ്ടെത്തിയത്. പ്രതിദിന കേസുകളുടെ വര്ധനവിന്റെ നിരക്കില് കേരളം ഒന്നാംസ്ഥാനത്താണെന്ന് പഠനം പറയുന്നു. 4.30 ശതമാനമാണ് കേരളത്തിലെ രോഗവര്ധനയുടെ നിരക്ക്. പോസിറ്റീവ് ആകുന്നവരുടെ നിരക്കിലും കേരളം മുന്പന്തിയിലാണ്. മഹാരാഷ്ട്രയ്ക്ക് പിന്നില് രണ്ടാംസ്ഥാനത്താണ് കേരളമുള്ളത്. 17.80 ശതമാനം ആണ് കേരളത്തില് കോവിഡ് പോസിറ്റീവ് ആകുന്നവരുടെ നിരക്ക്. കഴിഞ്ഞ ദിവസങ്ങളിലെ ഓണം അവധിമൂലം പരിശോധനയില് കാര്യമായ കുറവാണ് ഉണ്ടായത്. അതിനു മുന്പുള്ള ദിനങ്ങളില് ദിനേന രണ്ടായിരത്തിനു മുകളിലാണ് പോസ്റ്റീവ് കേസുകളുടെ എണ്ണം. ചിലപ്പോള് പ്രതിദിനം 20,000 പേര്ക്കു വരെ പോസിറ്റീവ് ആകാമെന്ന് മുന്കൂര് ജാമ്യവും ആരോഗ്യമന്ത്രി നേരത്തേ സ്വീകരിച്ചിരുന്നു.
