തൃശൂര്‍: യുവാക്കളെയും വ്യവസായികളെയും ഫേസ്ബുക്, വാട്സാപ്പ് വഴി പരിചയപ്പെട്ട് ഫ്ളാറ്റില്‍ വിളിച്ചുവരുത്തി ചിത്രങ്ങളും വീഡിയോകളും പകര്‍ത്തി ഭീഷണിപ്പെടുത്തി പണം തട്ടുന്ന സംഘത്തിലെ രണ്ട് പേര്‍ കൂടി പോലീസിന്റെ പിടിയിലായി. തൃശൂര്‍ സ്വദേശിയായ വ്യവസായിയുടെ പരാതിയുടെ അടിസ്ഥാനത്തില്‍ കേസെഎടുത്ത് അന്വേഷണം നടത്തി. ഈ കേസിലെ ഒന്നാംപ്രതിയടക്കം മൂന്നു പ്രതികളെ നേരത്തെ കൊടുങ്ങല്ലൂര്‍ സിഐ പി.കെ. പത്മരാജന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തിരുന്നു.
കേസിലെ രണ്ടും നാലും പ്രതികള്‍ വയനാട് ഒളിവില്‍ കഴിഞ്ഞുവരുന്നതായി വിവരം ലഭിച്ചതിന്റെ അടിസ്ഥാനത്തില്‍ കല്‍പ്പറ്റ ഭാഗത്തുനിന്ന് പ്രതികളായ ചാവക്കാട് ബ്ലാങ്ങാട് തറപറമ്പില്‍ ഖാദറിന്റെ മകന്‍ അക്ബര്‍ഷ (35)വയനാട് വൈത്തിരി സ്വദേശിനി പറക്കാട്ടില്‍ ഷെഫീറിന്റെ ഭാര്യ നസീമ എന്ന് വിളിക്കുന്ന നസി (35) എന്നിവരെയാണ് അറസ്റ്റ് ചെയ്തത്. അന്വേഷണ സംഘത്തില്‍ എസ്ഐ കശ്യപന്‍, പ്രദീപ്, സീനിയര്‍ സിപിഒമാരായ അസ്മാബി, ഗോപകുമാര്‍, ചഞ്ചല്‍ എന്നിവരുമുണ്ടായിരുന്നു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
