മാഞ്ചസ്റ്റര്‍: മെസി വീണ്ടും പെപ് ഗ്വാര്‍ഡിയോളയുടെ കൈകളിലേക്കെത്തുന്നു. മിസ്റ്റര്‍ ബാഴ്‌സലോണ എന്ന വിളിപ്പേര് മെസിക്കിനി വേണ്ട. അയാളുടെ മനസ്സ് മാറി… അന്താരാഷ്‌ട്ര മാധ്യമത്തില്‍ മെസി ക്ലബ്ബ് വിടുന്നതുമായി ബന്ധപ്പെട്ട് ഇന്നലെ വന്ന തലക്കെട്ടാണിത്. പെപ് ഗ്വാര്‍ഡിയോള എന്ന പരിശീലകനാണ് മെസിയെ മാഞ്ചസ്റ്റര്‍ സിറ്റിയിലേക്ക് ആകര്‍ഷിക്കുന്ന പ്രധാന കാരണം. മെസിക്കായി നല്‍കേണ്ട വന്‍ തുക നല്‍കാനും സിറ്റിക്ക് സാധിക്കും. കഴിഞ്ഞ ദിവസം ഗ്വാര്‍ഡിയോളയുമായി മെസി ചര്‍ച്ച നടത്തിയെന്ന തരത്തില്‍ വാര്‍ത്തകളും വന്നിരുന്നു.
കഴിഞ്ഞ ഫെബ്രുവരിയില്‍ മെസി ബാഴ്‌സ വിടുന്നതുമായി ബന്ധപ്പെട്ട് അഭ്യൂഹം പരന്നപ്പോള്‍ ഗ്വാര്‍ഡിയോളയുടെ വാക്കുകള്‍ ഇതായിരുന്നു. ‘മെസി ബാഴ്‌സലോണയുടെ താരമാണ്. ബാഴ്‌സയുടെ മാത്രം. വ്യക്തിപരമായി അതാണ് എനിക്ക് ഇഷ്ടവും’. എന്നാല്‍ ഇപ്പോള്‍ സാഹചര്യം മാറിയതോടെ ഗ്വാര്‍ഡിയോളയും മാറി ചിന്തിക്കാന്‍ തുടങ്ങിയെന്നാണ് റിപ്പോര്‍ട്ടുകള്‍.
2012ല്‍ ഗ്വാര്‍ഡിയോള ബാഴ്‌സ വിട്ടപ്പോള്‍ യാത്രയയപ്പ് ചടങ്ങില്‍ മെസി വിട്ടുനില്‍ക്കുയും പിന്നീട് ട്വിറ്ററില്‍ പ്രതികരിക്കുകയും ചെയ്തത് ചര്‍ച്ചയായിരുന്നു. ‘എന്നെ മികച്ച താരമാക്കിയത് ഗ്വാര്‍ഡിയോളയാണ്. അയാള്‍ ക്ലബ്ബ് വിടുന്നത് എനിക്ക് സഹിക്കാനാകില്ല. വിഷമിക്കുന്ന മുഖവുമായി ക്യാമറകളുടെ മുന്നില്‍ വരാനാകില്ലാത്തതിനാലാണ് ചടങ്ങില്‍ പങ്കെടുക്കാഞ്ഞത്’. ബാഴ്‌സയിലെ പഴയ കൂട്ടുകെട്ട് സിറ്റിയില്‍ വീണ്ടും ഒന്നിക്കുമെന്ന പ്രതീക്ഷയിലാണ് ഫുട്‌ബോള്‍ ആരാധകര്‍.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: