ന്യൂദല്ഹി: ദേശീയതലത്തില് കേന്ദ്ര വാര്ത്താ വിതരണ പ്രക്ഷേപണ മന്ത്രാലയവും നാഷണല് ഫിലിം ഡെവലപ്മെന്റ് കോര്പറേഷനും സംയുക്തമായി സംഘടിപ്പിച്ച ഹ്രസ്വചിത്ര മത്സരത്തില് മലയാളിക്ക് പുരസ്കാരം. തിരുവനന്തപുരം സ്വദേശി യുവരാജ് ഗോകുല് സംവിധാനം ചെയ്ത ‘ടെണ് റുപ്പി’ക്കാണ് മത്സരവിഭാഗത്തില് മൂന്നാംസ്ഥാനം ലഭിച്ചത്. കേന്ദ്ര വാര്ത്താ വിതരണ പ്രക്ഷേപണ മന്ത്രി പ്രകാശ് ജാവദേക്കര് ട്വിറ്ററിലൂടെയാണ് വിജയികളെ പ്രഖ്യാപിച്ചത്.
സ്വാതന്ത്ര്യദിനാഘോഷ പരിപാടികളുമായി ഭാഗമായാണ് ദേശീയതലത്തില് ഇത്തരമൊരു മത്സരം സംഘടിപ്പിച്ചത്. ‘ആത്മനിര്ഭര്’ ആയിരുന്നു മത്സര വിഷയം. 865 ഹ്രസ്വചിത്രങ്ങളാണ് മത്സരത്തിനായി എത്തിയിരുന്നത്. ഇതില് മത്സരിച്ചാണ് യുവരാജ് ഗോകുല് മലയാളികളുടെ അഭിമാനമായത്.
അഭിജിത്ത് പോളിന്റെ ‘ആം ഐ’യും ദിബോജോ സന്ജീവ് തയാറാക്കിയ ‘അബ് ഇന്ത്യ ബനേഗ ഭാരത്’ യഥാക്രമം ഒന്നും രണ്ടും സ്ഥാനങ്ങള് കരസ്ഥമാക്കി. വിജയികളെ ട്വിറ്ററിലൂടെ മന്ത്രി പ്രകാശ് ജാവദേക്കര് അഭിനന്ദിച്ചു. പരിപാടി വിജയിപ്പിക്കാന് സഹായിച്ചവര്ക്കും മത്സരത്തില് പങ്കെടുത്തവര്ക്കും മന്ത്രി നന്ദി പറഞ്ഞു.
തിരുവനന്തപുരം പാപ്പനംകോട് ഗോകുലത്തില് രാജന് നായര്- സതി കുമാരി ദമ്പതികളുടെ ഏകമകനാണ് യുവരാജ് ഗോകുല്. ഭാര്യ: ശ്രീലക്ഷ്മി നമ്പ്യാര്( ഇന്റീരിയര് ഡിസൈനര്), മകന്: ഋഷഭേശ്വര് ഗൗരിക്ക്.
