കോലഞ്ചേരി : വൃദ്ധയെ കൂട്ട ബലാത്സംഗത്തിന് ഇരയാക്കിയതായി പരാതി. കോലഞ്ചേരി പാങ്കോട്ടില് മൂന്ന് പേര് മദ്യലഹരിയില് പീഡിപ്പിച്ചശേഷം ക്രൂര മര്ദ്ദനത്തിന് ഇരയാക്കിയതായാണ് പരാതി. എഴുപത്തിയഞ്ചുകാരിയായ വൃദ്ധയുടെ ശരീരത്തിന് അകത്തും പുറത്തും ഗുരുതരമായ പരിക്കുകളോടെ ഇവരെ കോലഞ്ചേരി മെഡിക്കല് കോളേജില് പ്രവേശിപ്പിച്ചിരിക്കുകയാണ്.
ബന്ധുക്കളുടെ പരാതിയില് മൂന്ന് പേരെ പുത്തന്കുരിശ് പോലീസ് കസ്റ്റഡിയിലെടുത്തിട്ടുണ്ട്. ശരീരമാസകലം മാരകായുധം ഉപയോഗിച്ച് മുറിപ്പെടുത്തിയത് മൂലം വന്കുടലിന് അടക്കം ഗുരുതരമായി പരിക്കേറ്റിട്ടുണ്ട്.
ഞായറാഴ്ച പുറത്തിറങ്ങി നടക്കുന്നതിനിടെ വൃദ്ധ സംഭവം നടന്ന വീട്ടിലേക്ക് പ്രതികള് വിളിച്ചു കയറ്റുകയായിരുന്നു. തുടര്ന്നാണ് പീഡനം നടത്തിയത്. ബലാത്സംഗ ശേഷം പ്രതികള് കത്തി ഉപയോഗിച്ച് വൃദ്ധയുടെ ശരീരം മുഴുവന് വരഞ്ഞു. സ്വകാര്യഭാഗത്ത് കത്തിപോലുള്ള മാരകമായ ആയുധം ഉപയോഗിച്ച് ആഴത്തില് മുറിവേല്പിച്ചിട്ടുണ്ട്. ഇവര്ക്ക് പ്രായാധിക്ക്യം മൂലം ചെറിയ ഓര്മ്മ തകരാര് ഉള്ളതാണ്.
അതിനാല് കുറ്റത്തിന്റെ ഗൗരവം ഇപ്പോഴും ഇവര്ക്ക് മനസിലായിട്ടില്ല. മുറിവിന്റെ വേദന മാത്രമേ ഇവര് പറയുന്നുള്ളൂ. സംഭവത്തെ കുറിച്ച് ഇവര്ക്ക് ഓര്ത്തെടുക്കാന് കഴിയുന്നില്ല. ഞായറാഴ്ചയാണ് സംഭവം നടന്നതെങ്കിലും തിങ്കളാഴ്ച രാത്രിയാണ് ഈ ക്രൂരത പുറത്തറിയുന്നത്. വൃദ്ധയെ അടിയന്തര ശസ്ത്രക്രിയക്ക് വിധേയയാക്കിയിട്ടുണ്ട്.
