തിരുവനന്തപുരം: അന്താരാഷ്ട്ര സ്വര്ണക്കടത്ത് കേസിലെ മുഖ്യപ്രതി സ്വപ്ന സുരേഷിന്റെ നേതൃത്വത്തില് നടത്തിയ സ്പെയ്സ് ക്ലോണ്ക്ലേവിലും ദുരൂഹത. ഐഎസ്ആര്ഒ, വിഎസ്എസ്എസ്സി ശാസ്ത്രജ്ഞരെ വലയിലാക്കാനുള്ള ശ്രമമെന്ന് സംശയം. സംസ്ഥാന സര്ക്കാരിന്റെ സ്പെയ്സ് കേരള വിഭാഗം നടത്തിയ ബഹിരാകാശ കോണ്ക്ലേവില് പങ്കെടുത്തത് വിദേശത്തെയും സ്വദേശത്തെയും ശാസ്ത്രജ്ഞരും സ്വകാര്യ സംരംഭകരും. ഇത് സംബന്ധിച്ച വിവിധ കരാറുകളില് ഏര്പ്പെട്ടത് സ്വപ്നയെന്ന് സൂചന.
ഈ വര്ഷം ജനുവരി 31നും ഫെബ്രുവരി ഒന്നിനും തിരുവനന്തപുരം റാവിസ് ലീലാ ഹോട്ടലിലാണ് ‘എഡ്ജ് 2020’ എന്ന പേരില് സ്പെയ്സ് കോണ്ക്ലേവ് സംഘടിപ്പിച്ചത്. മുഖ്യ സംഘാടക സ്വപ്ന സുരേഷ് ആയിരുന്നു. മുഖ്യമന്ത്രിയുടെ കീഴിലുള്ള സയന്സ് ആന്ഡ് ടെക്നോളജി വകുപ്പിന്റെ കീഴില് സ്പെയ്സ് പാര്ക്കില് സ്പെയ്സ് പാര്ക്ക് പ്രോജക്ട് ഓപ്പറേഷന് മാനേജര് എന്ന പേരിലായിരുന്നു സംഘാടനം. ശാസ്ത്ര രംഗത്തുള്ള സ്റ്റാര്ട്ടപ്പുകള്, എംഎസ്എംഇകള്, ഗവേഷകസ്ഥാപനങ്ങള് എന്നിവയെ കേരള സര്ക്കാര് പ്രോത്സാഹിപ്പിക്കുന്നു എന്ന തലക്കെട്ടോടെയാണ് പരിപാടി സംഘടിപ്പിച്ചത്. സംരംഭകരെയും ശാസ്ത്രജ്ഞരെ ക്ഷണിച്ചതും സ്വപ്നയാണ്.
ഐഎസ്ആര്ഒ, വിഎസ്എസ്സിയില് നിന്നടക്കം സീനിയര്-ജൂനിയര് ശാസ്ത്രജ്ഞരെ പരിപാടിയിലേക്ക് ക്ഷണിച്ചിരുന്നു. ഇവരില് പലരുമായും സ്വപ്നയും സംഘവും സൗഹൃദം സ്ഥാപിക്കാനുള്ള ശ്രമം നടത്തി. വിദേശത്ത് നിന്നുള്ള ബഹിരാകാശ സ്വകാര്യ കമ്പനികളുടെ മേധാവികളുമായി ബന്ധപ്പെടാനും ഇവര്ക്ക് അവസരം ഒരുക്കി. വിഎസ്എസ്്എസ്സി, ഐഎസ്ആര്ഒ ഉള്പ്പെടെയുള്ള സ്ഥാപനങ്ങളെ മറയാക്കി ചില സ്വകാര്യ വന്കിട കമ്പനികളുമായി കരാറുകള് പരിപാടിയില് വച്ച് ഒപ്പിട്ടിരുന്നു. കരാറുകളെ സംബന്ധിച്ചും ദുരൂഹത നിലനില്ക്കുന്നു.
മുഖ്യമന്ത്രിയുടെ ശാസ്ത്ര ഉപദേഷ്ടാവ് എം.സി. ദത്തന്, മുന് പ്രിന്സിപ്പല് സെക്രട്ടറി എം. ശിവശങ്കര് എന്നിവരായിരുന്നു സമ്മേളനത്തിലെ പ്രധാനികള്. ഈ സമ്മേളനത്തില് ഫെബ്രുവരി ഒന്നിന് വൈകിട്ട് നാല് മണി മുതല് നാല് മണിക്കൂറാണ് മുഖ്യമന്ത്രി പിണറായി വിജയന് പങ്കെടുത്തത്. അന്താരാഷ്ട്ര സ്വര്ണക്കടത്തുമായി ബന്ധമുള്ളവര് ഈ പരിപാടിയുടെ മുഖ്യ സംഘാടകരായത് സംബന്ധിച്ച് സംശയങ്ങളാണ് ഇപ്പോള് ഉയരുന്നത്. പരിപാടി സംഘടിപ്പിച്ചതും പ്രൈസ് വാട്ടര് ഹൗസ് കൂപ്പേഴ്സ് ആണെന്നും ഈ പരിപാടിയുടെ സ്പോണ്സര്ഷിപ് വിറ്റതുപോലും കോടികള്ക്കാണെന്ന ആരോപണവും ഉണ്ട്.
ജന്മഭൂമി ഓണ്ലൈന്