തൃശൂര്‍ : ഒരു നൂറ്റാണ്ടിലേറെ പഴക്കമുള്ള തൃശൂര്‍ നഗരത്തിലെ മൃഗശാല തൃശൂരിനടുത്തുള്ള പുത്തൂര്‍ വനമേഖലയിലേക്ക് മാറ്റിസ്ഥാപിക്കുന്നതിനുള്ള നടപടികള്‍ പുരോഗമിക്കുന്നു. 2020 അവസാനത്തോടെ തൃശൂര്‍ മൃഗശാലയിലുള്ള മൃഗങ്ങളെ പുത്തൂരിലേക്ക് മാറ്റാനാണ് ലക്ഷ്യമിടുന്നത്.
338 ഏക്കര്‍ വനഭൂമിയില്‍ വന്യജീവികളെ പരിപാലിക്കുന്നതിനായി വിശാലമായ 23 വാസസ്ഥലങ്ങള്‍, പാര്‍ക്കിങ് സൗകര്യം, സന്ദര്‍ശകര്‍ക്കുള്ള അടിസ്ഥാന സൗകര്യം, സൂ ഹോസ്പിറ്റല്‍ സമുച്ചയം എന്നിവ ഉള്‍പ്പെടുന്ന പുത്തൂരിലെ സൂവോളജിക്കല്‍ പാര്‍ക്ക് പൂര്‍ണ്ണമായും ആധുനിക സൗകര്യങ്ങള്‍ ഉള്‍പ്പെടുത്തി രൂപകല്‍പന ചെയ്ത ഇന്ത്യയിലെ ആദ്യത്തെ സൂവോളജിക്കല്‍ പാര്‍ക്കായിരിക്കും.
2018 ഫെബ്രുവരിയില്‍ ആരംഭിച്ച ഒന്നാംഘട്ടത്തില്‍ പക്ഷിക്കൂട്, കരിങ്കുരങ്ങ്, സിംഹവാലന്‍ കുരങ്ങ്, കാട്ടുപോത്ത്, എന്നീ നാലിനം കൂടുകളുടെ നിര്‍മ്മാണം 80 ശതമാനം പൂര്‍ത്തീകരിച്ചു. ഈ പ്രവൃത്തികള്‍ക്കായി 20 കോടി രൂപ ഇതിനകം ചിലവഴിച്ചു. 2020 ജൂലൈ 31 നകം നിര്‍മ്മാണം പൂര്‍ത്തീകരിക്കും.
തൃശൂര്‍ മൃഗശാലയിലെ നിലവിലുള്ള മൃഗങ്ങളെ 2020 ഡിസംബറോടെ മാറ്റി പാര്‍പ്പിക്കുവാന്‍ കഴിയുന്ന വിധത്തില്‍ ഇതിനായുള്ള മൃഗശാല ആശുപത്രി സമുച്ചയത്തിന്റെ നിര്‍മ്മാണം കെപിഎച്ച്‌സിസിയുടെ നേതൃത്വത്തില്‍ പുരോഗമിക്കുന്നു. പുത്തൂരില്‍ ഒരുക്കിയ അതി വിപുലമായ അന്തരീക്ഷത്തിലേക്ക് മാറുന്നത് പക്ഷിമൃഗാദികള്‍ക്കും സന്ദര്‍ശകര്‍ക്കും ജീവനക്കാര്‍ക്കും ഒരുപോലെ സന്തോഷമേകുന്നതാണ്.
പ്രതികരിക്കാൻ ഇവിടെ എഴുതുക: