ടൂറിന്‍: സ്റ്റാര്‍ സ്‌ട്രൈക്കര്‍ ക്രിസ്റ്റിയാനോ റൊണാള്‍ഡോയുടെ മികവില്‍ യുവന്റസിന് മിന്നും വിജയം. സിരി എയില്‍ യുവന്റസ്,പത്ത് പേരുമായി പൊരുതിയ ലെസെയെ മടക്കമില്ലാത്ത നാലു ഗോളുകള്‍ക്ക് കീഴടക്കി. ഒരു ഗോള്‍ അടിക്കുകയും മറ്റ് രണ്ട് ഗോളുകള്‍ക്ക് വഴിയൊരുക്കുകയും ചെയ്ത റൊണാള്‍ഡോ കളിയിലെ കേമനായി.
പോയിന്റ് നിലയില്‍ ഒന്നാം സ്ഥാനത്ത് തുടരുന്ന യുവന്റസിന്റെ ലീഡ് ഈ വിജയത്തോടെ ഏഴു പോയിന്റായി. 28 മത്സരങ്ങളില്‍ യുവന്റസിന് 69 പോയിന്റുണ്ട്് . രണ്ടാം സ്ഥാനത്തുളള ലാസിയോ യുവന്റസിനെക്കാള്‍ ഏഴു പോയിന്റിന് പിന്നിലാണ്. അവര്‍ക്ക് 27 മത്സരങ്ങളില്‍ 62 പോയിന്റാണുളളത്.
റൊണാള്‍ഡോക്ക് പുറമേ പാബ്‌ളോ ഡിബാല, ഗോണ്‍സാലോ ഹിഗ്വയ്ന്‍, മത്തിയാസ് ഡി ലിറ്റ് എന്നിവരാണ് ഗോളുകള്‍ നേടിയത്.
പോയിന്റ് നിലയില്‍ ഏറെ പിന്നില്‍ നില്‍ക്കുന്ന ലെസെ ആദ്യ പകുതിയില്‍ ശക്തരായ യുവന്റസിനെ ഗോള്‍ രഹിത സമനിലയില്‍ പിടിച്ചു നിര്‍ത്തി. മുപ്പത്തിയൊന്നാം മിനിറ്റില്‍ അവരുടെ ഫാബിയോ ലൂസിയോണിവാസ് ചുവപ്പ് കാര്‍ഡ് കണ്ട് പുറത്തായതോടെ ലെസെയുടെ പിടി അയഞ്ഞു. യുവന്റസ് താരം റോഡ്രിഗോ ബെന്‍ടാങ്കറിനെ ഫൗള്‍ ചെയ്തതിനാണ് ഫാബിയോയെ പുറത്താക്കിയത്. രണ്ടാം പകുതിയുടെ തുടക്കത്തില്‍ യുവന്റ്‌സ് ആദ്യ ഗോള്‍ നേടി. കളം നിറഞ്ഞു കളിച്ച റൊണാള്‍ഡോയുടെ പാസ് മുതലാക്കി ഡിബാലയാണ് ആദ്യ ഗോള്‍ അടിച്ചത്. അറുപത്തിരണ്ടാം മിനിറ്റില്‍ റൊണാള്‍ഡോ ഗോള്‍ അടിച്ച്് ലീഡ് 2-0 ആക്കി.
കളിയവസാനിക്കാന്‍ ഏഴു മിനിറ്റുള്ളപ്പോള്‍ റൊണാള്‍ഡോയുടെ മൈനസ് പാസ് ലെസെയുടെ ഗോള്‍ വലയിലേക്ക് തിരിച്ചുവിട്ട് ഹിഗ്വയ്ന്‍ മൂന്നാം ഗോളും കുറിച്ചു. അവസാന നിമിഷങ്ങളില്‍ ഡച്ച് പ്രതിരോധ താരമായ ഡി ലിറ്റ് ഹെഡ്ഡറിലൂടെ നാലാം ഗോളും നേടി.
അടുത്ത മത്സരത്തില്‍ യുവന്റസ് ജൂലൈ ഒന്നിന് ജെനോവയെ നേരിടും.
പ്രതികരിക്കാൻ ഇവിടെ എഴുതുക: