അടിമാലി: ശീതകാല പച്ചക്കറി കൃഷിയുടെ കേന്ദ്രമായ വട്ടവടയിലെ ജലക്ഷാമം കര്ഷകര്ക്ക് വെല്ലുവിളി ഉയര്ത്തുന്നു. ഗ്രാന്റീസ് മരങ്ങളുടെ വ്യാപനമാണ് സ്ഥിതി ഇത്രത്തോളം രൂക്ഷമാക്കുന്നതെന്നാണ് കര്ഷകരുടെ വാദം.
വര്ഷങ്ങള്ക്ക് മുമ്പ് സോഷ്യല് ഫോറസ്ട്രിയുടെ ഭാഗമായിട്ടായിരുന്നു വട്ടവടയിലും സമീപപ്രദേശങ്ങളിലും ഗ്രാന്റീസ് മരങ്ങള് നട്ടുപിടിപ്പിച്ചത്. പിന്നീടിവ മുറിച്ച് നീക്കുന്നതിന് നിയമ തടസങ്ങള് ഉണ്ടായി. നീര്ച്ചാലുകള് ഉള്പ്പെടെ വറ്റിവരളാന് കാരണം ഗ്രാന്റീസ് മരങ്ങളുടെ വ്യാപനമാണെന്ന് കര്ഷകര് പറയുന്നു.
മരങ്ങള് മുറിച്ചുമാറ്റാന് സര്ക്കാര് തലത്തില് ഇടപെടല് ഉണ്ടായിട്ടും ഉദ്യോഗസ്ഥരുടെ ഭാഗത്തു നിന്ന് വേണ്ട സഹകരണം ലഭിക്കുന്നില്ലെന്ന് വട്ടവട ഗ്രാമപഞ്ചായത്ത് പ്രസിഡന്റ് രാമരാജ് പറഞ്ഞു.
ജലക്ഷാമം പ്രദേശത്തെ കര്ഷകര്ക്ക് വലിയ ആശങ്ക നല്കുന്നുണ്ട്. വെള്ളം കിട്ടാതായാല് കൃഷി പാടെ കരിഞ്ഞുണങ്ങും. മരങ്ങള് മുറിച്ച് നീക്കുന്നതിനും പ്രദേശത്തെ ജലസേചന സംവിധാനം കൂടുതല് കാര്യക്ഷമമാക്കുന്നതിനും അടിയന്തര ഇടപെടല് വേണമെന്നാണ് കര്ഷകരുടെ ആവശ്യം.
