കോഴിക്കോട്: എല്പി സ്കൂളുകളിലെ വിദ്യാര്ത്ഥികള്ക്ക് സംസ്കൃത പഠനം നിഷേധിക്കുന്നത് വിദ്യാഭ്യാസ അവകാശ നിയമത്തിന്റെ ലംഘനവും പച്ചയായ വിവേചനവുമാണെന്ന് കേരള ഡിപ്പാര്ട്ട്മെന്റ് സംസ്കൃത അദ്ധ്യാപക ഫെഡറേഷന് സംസ്ഥാന ജനറല് സെക്രട്ടറി പി.ജി. അജിത്ത് പ്രസാദ് പറഞ്ഞു. എല്പിസ്കൂളുകളില് സംസ്കൃത പഠനം നിഷേധിക്കുന്നുവെന്ന ജന്മഭൂമി വാര്ത്തയോട് പ്രതികരിക്കുകയായിരുന്നു അദ്ദേഹം.
കഴിഞ്ഞ യുഡിഎഫ് സര്ക്കാര് എല്പി സ്കൂളുകളില് സംസ്കൃത പഠനം ആരംഭിക്കാനുള്ള ശ്രമത്തിന് തുടക്കം കുറിച്ചെങ്കിലും ഇടതുപക്ഷ സര്ക്കാര് ഇക്കാര്യത്തില് ഒരിഞ്ചുപോലും മുന്നോട്ട് പോയിട്ടില്ല. നിലവില് ഒന്ന് മുതല് ഏഴ് വരെ ഒരു യൂണിറ്റായി പ്രവര്ത്തിക്കുന്ന യുപി സ്കൂളുകളിലെ എല്പി വിഭാഗം വിദ്യാര്ത്ഥികള്ക്ക് മാത്രമാണ് സംസ്കൃതം പഠിക്കാന് അവസരമുള്ളത്.
എല്പി വിഭാഗം മാത്രമുള്ള പൊതുവിദ്യാലയങ്ങളില് പഠിക്കേണ്ടിവരുന്ന വിദ്യാര്ത്ഥികള്ക്ക് സംസ്കൃത പഠനാവസരം നിഷേധിക്കുന്നത് വിവേചനമാണ്. വിദ്യാര്ത്ഥികളെ രണ്ടായി തരംതിരിക്കുന്ന സമീപനമാണ് സര്ക്കാറിന്റേത്. ബാലാവകാശ കമ്മീഷന്റെ നിര്ദ്ദേശം പോലും പരിഗണിച്ചില്ല.
നിലവില് യുപി സ്കൂളുകളിലെ എല്പി വിഭാഗത്തില് എത്ര വിദ്യാര്ത്ഥികള് പഠിക്കുന്നുണ്ടെന്ന കണക്ക് പോലും സര്ക്കാര് എടുക്കുന്നില്ല. ആറാം പ്രവൃത്തി ദിവസം ഈ കണക്ക് എടുക്കാത്തതിനാല് എത്ര വിദ്യാര്ത്ഥികള് സംസ്ഥാനത്ത് സംസ്കൃതം പഠിക്കുന്നുണ്ടെന്ന കണക്ക് പോലും സര്ക്കാറിന്റെ കൈവശമില്ല. എത്ര പാഠ പുസ്തകങ്ങള് അച്ചടിക്കണമെന്ന ധാരണ പോലും സര്ക്കാറിന് ഇതുമൂലം ലഭിക്കുന്നില്ല.
അധിക സാമ്പത്തിക ബാദ്ധ്യതയില്ലാതെതന്നെ പരിഹരിക്കാവുന്ന പ്രശ്നമാണ് സര്ക്കാര് വലിച്ചുനീട്ടുന്നത്. പ്രൊട്ടക്റ്റഡ് അദ്ധ്യാപകരനായി നിരവധി പേരാണ് ബിആര്സിയിലുള്ളത്. വിദ്യാഭ്യാസ മന്ത്രിയുടെയും പൊതു വിദ്യാഭ്യാസ വകുപ്പിലെ ഉന്നതരുടെയും മുന്നില് പലതവണ ഇക്കാര്യം ശ്രദ്ധയില്പ്പെടുത്തിയതാണ്. എന്നാല് ഇതുവരെ ഒരു മറുപടിപോലും നല്കിയിട്ടില്ലെന്ന് അദ്ദേഹം പറഞ്ഞു.
