മണ്ണാര്‍ക്കാട്: നിരവധി ക്രിമിനല്‍ കേസുകളിലെ പ്രതിയെ സ്വകാര്യ വ്യക്തിയുടെ കെട്ടിടത്തില്‍ മരിച്ച നിലയില്‍ കണ്ടെത്തി. മണ്ണാര്‍ക്കാട് പെരിച്ചോളം കൊടുവാളി കുണ്ടില്‍ പുല്‍ക്കുഴിയില്‍ മുഹമ്മദാലി(62)യെയാണ് തലയില്‍ നിന്ന് രക്തം വാര്‍ന്നൊഴുകി മരിച്ച നിലയില്‍ കണ്ടെത്തിയത്. നാട്ടുകാരാണ് വിവരം പോലീസിനെ അറിയിച്ചത്. വിവസ്ത്രനായി കമിഴ്ന്നു കിടക്കുന്ന നിലയിലായിരുന്നു മൃതദേഹം കിടന്നിരുന്നത്.
സംഭവസ്ഥലത്ത് മണ്ണാര്‍ക്കാട് സിഐ എം.കെ. സജീവിന്റെ നേതൃത്വത്തില്‍ പരിശോധന നടത്തുന്നതിനിടെ കെട്ടിടത്തിന്റെ മൂന്നാം നിലയില്‍ കിടന്നുറങ്ങുകയായിരുന്ന ഒരാളെ പിടികൂടിയിട്ടുണ്ട്.മൃതദേഹത്തിനടുത്ത് നിന്ന് രക്തക്കറയുള്ള ഒരു വെട്ടുകല്ല് കണ്ടെത്തി.
ഷൊര്‍ണൂര്‍ ഡിവൈഎസ്പി എന്‍. മുരളീധരന്‍, പാലക്കാട് നിന്ന് ഫോറന്‍സിക്ക് വിഭാഗം ഓഫീസര്‍ സൗഫിന, ഷൊര്‍ണൂരില്‍ നിന്നെത്തിയ ഡോഗ് സ്‌ക്വാഡ് അംഗങ്ങളായ കൃഷ്ണകുമാര്‍, നികേഷ്, പാറു എന്ന പോലീസ് നായ, ഫിംഗര്‍ പ്രിന്റ് ഉദ്യോഗസ്ഥരായ രാജേഷ്‌കുമാര്‍, കെ. വി. അജേഷ് എന്നിവര്‍ പരിശോധന നടത്തി. അസ്വാഭാവിക മരണത്തിന് പോലീസ് കേസെടുത്തു. ഇയാള്‍ക്കെതിരെ മണ്ണാര്‍ക്കാട് പോലീസ് സ്‌റ്റേഷനില്‍ നിരവധി കേസുകളുണ്ടെന്ന് പോലീസ് പറഞ്ഞു.
പ്രതികരിക്കാൻ ഇവിടെ എഴുതുക: